Sjálfsmat skólans byggir á lögum um framhaldsskóla, leiðbeiningum um sjálfsmat frá menntamálaráðuneyti, skólasamningi, aðalnámskrá, grunnþáttum menntunnar, stefnu skólans og leiðbeiningum um sjálfsmat skóla frá Sigurlínu Davíðsdóttur.
Í lögum um framhaldsskóla er fjallað um innra mat. Þar er tilgreint að skólar skuli meta kerfisbundið árangur og gæði. Markmið matsins eru í fyrsta lagi að veita upplýsingar. Í öðru lagi að tryggja að starfsemi sé í samræmi við lög, reglur og námskrá. Í þriðja lagi að auka gæð náms og skólastarfs og stuðla að umbótum og í fjórða lagi að tryggja rétt nemenda og þjónustu við þá. Skólum ber einnig samkvæmt lögunum að birta opinberlega innra mat sitt.
Menntamálaráðuneytið gaf árið 1997 út almennar leiðbeiningar fyrir sjálfsmat í leikskólum, grunnskólanum og framhaldsskólum. Þar eru sett fram tíu viðmið fyrir úttektir á sjálfsmatsaðferðum skóla. Þar er tilgreint að matið þurfi að vera: Formlegt, altækt, áreiðanlegt, samstarfsmiðað, umbótamiðað, árangursmiðað, stofnana- og einstaklingsmiðað, lýsandi, greinandi og opinbert. Horft er til þessara atriða við skipulag sjálfsmatskerfis skólans.
Í skólasamningi er fjallað um innra mat og tilgreint að skólinn geri ráðuneyti grein fyrir verk- og framkvæmdaáætlun innra mats til næstu þriggja ára. Í skólasamningi eru einnig sett fram markmið skólastarfs. Í verk- og framkvæmdaáætlun er tilgreint hvernig og hvenær markmið í skólasamningi eru metin. Í sjálfsmatsskýrslu er svo fjallað sérstaklega um mat á markmiðum í skólasamningi.
Í aðalnámskrá er fjallað um mat á skólastarfi og tilgreint að tilgangurinn sé að tryggja réttindi nemenda og stuðla að skólaumbótum. Markmiðin eru þríþætt. Í fyrsta lagi að fylgjast með að skólastarfið sé í samræmi við lög og reglur. Í öðru lagi að auka gæði, stuðla að umbótum og tryggja réttindi nemenda. Í þriðja lagi að veita upplýsingar. Í aðalnámskrá er einnig fjallað um sex grunnþætti skólastarfs en þeir eru: Læsi, sjálfbærni, heilbrigði og velferð, lýðræði og mannréttindi, jafnrétti og sköpun. Í sjálfsmatskerfi skólans er lagt mat á hvernig tekst að ná markmiðum grunnþátta skólastarfs.
Í stefnu skólans koma fram áherslur í skólastarfi í einstaka málaflokkum og í skipulagi náms eins og það birtist í skólanámskrá. Í sjálfsmatskerfi skólans er hvorutveggja metið.