Álitlegt olíusvæði.
Í þessari viku fer fram landskeppni í olíuleit en FAS hefur allt frá árinu 2003 tekið þátt í tölvuleiknum PetroChallenge þar sem leitað er að olíu. Tilgangurinn með leiknum er að kynna störf í tengslum við olíuiðnað og hefur leikurinn verið notaður til að kynna atvinnugreinina fyrir nýjum starfsmönnum í olíuiðnaði.
Í gær lærðu þátttakendur leikinn og í dag er svo aðalkeppnin. Í FAS eru tvö lið sem keppa og nokkur í FÍV sem er Framhaldsskólinn í Vestmannaeyjum.
Það er margt sem þátttakendur þurfa að læra. Í fyrsta lagi læra nemendur hvernig olía verður til. Í öðru lagi þarf að athuga hvernig hægt er að nálgast olíuna og vinna hana á sem hagkvæmastan hátt. Þá er mikilvægt að dreifa áhættunni og það er gert með því að stofna hlutafélög. Það er mikilvægt að taka allar ákvarðanir af skynsemi því fyrir þær eru gefin stig. Leikurinn fer fram á ensku og það eru mörg ný hugtök sem bætast við orðaforðann. Það má því sannarlega segja að hér fari fram þverfaglegt nám.
Það er til mikils að vinna því það lið sem stendur uppi sem sigurvegari í keppninni í dag tekur þátt í lokakeppni PetroChallenge sem fer fram í London. Að sjálfsögðu vonum við að okkar fólki gangi sem best.
Oddleifur, Ástrós og Aðalsteinn.
Í kvöld keppir FAS við lið MH í Gettu betur. Þetta er í þrítugasta og annað sinn sem keppnin er haldin en 27 skólar skráðu sig til þátttöku að þessu sinni.
Lið FAS er skipað þeim Aðalsteini Gunnarssyni, Ástrós Anítu Óskarsdóttur og Oddleifi Eiríkssyni og leggst keppnin nokkuð vel í þau.
Viðureignin á milli skólanna hefst klukkan 20:30 í kvöld og verður útvarpað á Rás 2. Við hvetjum alla til að stilla viðtækin á Rás 2 og hlusta á þau spreyta sig.
Að sjálfsögðu óskum við okkar fólki góðs gengis.
Skólasetning vorannar 2018
Skólastarf vorannar hófst formlega í morgun með skólasetningu. Í kjölfarið voru umsjónarfundir þar sem lögð voru drög að starfi vorannarinnar.
Kennsla hefst í fyrramálið, föstudaginn 5. janúar samkvæmt stundaskrá.
Ef það eru enn einhverjir sem hafa hug að því að stunda nám við skólann er hægt að skoða námsframboð annarinnar hér.
Hægt er að sækja um nám á vef skólans til 10. janúar. En eins og áður hefur komið fram hefst kennsla á morgun og því best að skrá sig sem fyrst.
Sjáumst hress og kát í fyrramálið.
Skólastarfi haustannarinnar lýkur formlega í dag og allar einkunnir eiga að vera komnar í Innu fyrir lok dagsins. Um leið er komið jólafrí. Það verður örugglega kærkomið að leggja skræðurnar til hliðar um stund og jafnvel lúra lengur í skammdeginu.
Skólastarf vorannar hefst fimmtudaginn 4. janúar klukkan 10 en þá verður skólinn settur. Í kjölfarið verða umsjónarfundir þar sem nemendur fá afhentar stundaskrár. Kennsla hefst svo föstudaginn 5. janúar samkvæmt stundaskrá.
Starfsfólk FAS sendir nemendum sínum sem og landsmönnum öllum bestu óskir um gleðilega jólahátíð og vonar að nýtt ár verði öllum gott og gæfuríkt.
Undanfarnar annir hefur FAS verið að auka framboð á fjarnámi. Langflestir áfangar sem eru í boði í skólanum eru nú einnig fjarnámsáfangar. Helstu áherslur í fjarnámi eru persónuleg þjónusta við nemendur og ekki eru lengur lokapróf í áföngum en í staðinn ræða nemendur og kennari saman um það sem hefur áunnist á önninni. Vegna þessa hefur hlutfall fjarnemenda aukist jafnt og þétt við skólann.
Helsta markmið skólans er að bjóða fjarnemendum upp á persónulega þjónustu. Kennarar hafa samband við nemendur í upphafi annar í gegnum Skype eða aðra samskiptamiðla til að koma á tengslum. Allt námsefni er sett upp á Kennsluvef og er leitast við að hafa skipulag sem einfaldast og skýrast. Stutt myndbönd fylgja námsefninu þar sem farið er í helstu atriði. Nemendur skila verkefnum í gegnum Kennsluvefinn.
Núna í lok haustannar lagði Þekkingasetur Nýheima fyrir könnun meðal fjarnemenda um námið í FAS. Í úrvinnslu gagna fær FAS almennt mikið lof frá nemendum og kemur skólinn vel út í samanburði þeirra sem hafa reynslu af fjarnámi við aðra skóla. „Sanngjörn gjöld, góð samskipti við kennara, persónuleg þjónusta og engin lokapróf“ voru þeir þættir sem oftast voru nefndir sem þeir eiginleikar sem FAS hefur umfram aðra skóla.
Þegar fjarnemendur voru spurðir hvort þeir hefðu ábendingar til þeirra sem hygðu á nám vildu þeir koma eftirfarandi á framfæri:
„Ég mæli með FAS fyrir alla og tel hann fyrirmynd annarra skóla, ódýr og þægilegur.“ og “Mjög gott að vera í fjarnámi frá FAS.“
Hægt er að skrá sig í nám í FAS til 10. janúar með því að smella hér.
Hægt er að skoða námsframboð á vorönn 2018 hér.
Á þessari önn var sjónlistaráfanginn SJLI3VE05 kenndur í FAS og voru fjórir nemendur skráðir. Hver nemandi valdi sér þema í byrjun annar og vann með það út önnina í þeim tilgangi að setja upp sýningu í lok annar. Þemun sem nemendur völdu voru: andlit, bláar myndir, tré og útsýni.
Myndlistasýning sem fékk nafnið „Málalok“ var opnuð í Miklagarði 8. desember síðastliðinn og var opin um helgina. Þar gaf að líta verkefni annarinnar. Um 140 manns mættu á sýninguna sem er góð aðsókn á þeim tíma sem jólaundirbúningur er að ná hámarki.
Við viljum þakka listamönnunum og þeim sem að mættu fyrir að gera þetta svona vel heppnaðan og skemmtilegan viðburð.
Frá vinstri: Svafa Herdís Jónsdóttir, Ólafía Ingibjörg Gísladóttir, Páll E Kristjánsson og Ísabella Ævarsdóttir.
