Lilja Alfreðsdóttir menntamálaráðherra ásamt Hildi áfangstjóra og Eyjólfi skólameistara.
Það var margt góðra gesta á Hornafirði í gær en verið var að undirrita tilnefningu um að Vatnajökulsþjóðgarður og hluti gosbeltisins verði tilnefnd á heimsminjaskrá UNESCO. Það voru Lilja Alfreðsdóttir menntamálaráðherra og Guðmundur Ingi Guðbrandsson, umhverfis- og auðlindaráðherra sem undirrituðu tilnefninguna fyrir hönd íslenska ríkisins.
Í morgun heimsótti menntamálaráðherra FAS áður en flogið var til Reykjavíkur. Hún skoðaði skólann og kynnti sér starfsemina í Nýheimum. Einnig var farið í Vöruhúsið og skoðað hvað er í gangi þar. Í kynningu um FAS var talað um hversu mikilvægt fjarnám er í starfi skólans, Fjarmenntaskólann, áhersluna á lista- og menningarnám, fjallamennskunám og vísindaferðir. Ráðherra fannst mjög áhugavert að þessi litli skóli skuli bjóða upp á jafn fjölbreytt nám og raun ber vitni.
Við hér í FAS er afar ánægð með að hún skyldi hafa gefið sér tíma til að líta inn og þökkum henni kærlega fyrir komuna.
Á vef Mennta- og menningarmálaráðuneytisins er að finna meðfylgjandi frétt þar sem sagt frá heimsókn ráðherra í FAS.
Í gærkveldi stóð viðburðaklúbbur FAS fyrir mexíkóskri veislu á Nýtorgi. Fyrir þá sem ekki þekkja til mexíkóskrar matargerðar þá er hún litrík, með alls kyns sósum og auðvitað kitlar hún bragðlaukana.
Til veislunnar mættu tæplega tuttugu krakkar sem gæddu sér á ljúffengum mat og spjölluðu saman undir suður-amerískri tónlist. Allir voru mjög sáttir og höfðu gaman að þessari kvöldstund.
Það er mjög mikilvægt að breyta stundum til og prófa eitthvað nýtt og þessi kvöldstund í gær er ágætis dæmi um slíkt. Við hvetjum alla þá sem sátu heima núna að koma og vera með næst. Félagslífið verður skemmtilegra þegar fleiri mæta.
[modula id=“9740″]
Silja Rut skólasálfræðingur og Ragnheiður hjúkrunarfræðingur.
Í dag mættu til okkar í FAS þær Ragnheiður skólahjúkrunarfræðingur og Silja Rut sem er sálfræðingur hjá skólunum á Hornafirði á því sem við köllum uppbrot í skólastarfi.
Ragnheiður kynnti starfssvið sitt í skólanum og fjallaði einnig um mikilvægi þess að rækta sjálfan sig bæði líkamlega og andlega.
Silja lýsti algengum atriðum í kvíða og hvernig kvíði geti leitt til líkamlegra einkenna. Kvíði er upp að vissu marki eðlilegt ástand en ef kvíði varir lengi er hætta á að einstaklingur þrói með sér þunglyndi. Þunglyndi hefur farið vaxandi á heimsvísu og samkvæmt Alþjóðaheilbrigðisstofnuninni WHO stefnir í að þunglyndi verði næst stærsta heilsufarsvandamáli í heiminum. Mikilvægur þáttur til að sporna við þunglyndi er að beita hugrænni atferlismeðferð HAM. Hér er hægt að finna upplýsingar um HAM og hvar sé hægt að leita hjálpar.
Ragnheiður leggur mikla áherslu á að hún sé hér til staðar fyrir nemendur og sé tilbúin til að hjálpa sé þess kostur. Auk þess að hafa fasta viðveru í FAS á þriðjudögum á milli 8 og 12 er alltaf hægt að senda henni póst eða skilaboð á fésbókinni. Ragnheiður sér jafnframt um að vísa málum áfram til Silju Rutar telji hún ástæðu til.
Við hvetjum alla þá sem telja til þess ástæðu að nýta sér þessa einstöku þjónustu. Það á bæði við um nemendur og foreldra.
Eins og mörgum er kunnugt um hefur verið að fækka í árgöngum í sveitarfélaginu. Til að geta haldið uppi fjölbreyttu námsframboði hefur FAS brugðið á það ráð að endurskipuleggja og bæta fjarnámið með það í huga að fjölga nemendum.
Á þessari önn eru um 90 nemendur sem stunda fjarnám í FAS og er það umtalsverð fjölgun frá síðustu önn. Um tuttugu þessara nemenda koma frá Fjarmenntaskólanum en það er samstarfsvettvangur þrettán framhaldsskóla á landsbyggðinni. Margir nemendur eru í fleiri en einum áfanga og núna hafa 14 nemendur í hyggju að ljúka stúdentsprófi frá FAS í fjarnámi. Í velflestum áföngum á stúdentsbrautum eru 5 – 10 fjarnemendur og í sumum áföngum eru fleiri í fjarnámi en mæta í stofu.
Það virðist skipta marga nemendur máli að FAS hefur tekið upp breytt fyrirkomulag á lokamati sem er samtal nemenda og kennara í stað lokaprófs. Það hefur oft komið fram að margir eru haldnir prófkvíða og hafa ekki treyst sér í nám og eru tilbúnir að prófa nýtt fyrirkomulag.
Álitlegt olíusvæði.
Í þessari viku fer fram landskeppni í olíuleit en FAS hefur allt frá árinu 2003 tekið þátt í tölvuleiknum PetroChallenge þar sem leitað er að olíu. Tilgangurinn með leiknum er að kynna störf í tengslum við olíuiðnað og hefur leikurinn verið notaður til að kynna atvinnugreinina fyrir nýjum starfsmönnum í olíuiðnaði.
Í gær lærðu þátttakendur leikinn og í dag er svo aðalkeppnin. Í FAS eru tvö lið sem keppa og nokkur í FÍV sem er Framhaldsskólinn í Vestmannaeyjum.
Það er margt sem þátttakendur þurfa að læra. Í fyrsta lagi læra nemendur hvernig olía verður til. Í öðru lagi þarf að athuga hvernig hægt er að nálgast olíuna og vinna hana á sem hagkvæmastan hátt. Þá er mikilvægt að dreifa áhættunni og það er gert með því að stofna hlutafélög. Það er mikilvægt að taka allar ákvarðanir af skynsemi því fyrir þær eru gefin stig. Leikurinn fer fram á ensku og það eru mörg ný hugtök sem bætast við orðaforðann. Það má því sannarlega segja að hér fari fram þverfaglegt nám.
Það er til mikils að vinna því það lið sem stendur uppi sem sigurvegari í keppninni í dag tekur þátt í lokakeppni PetroChallenge sem fer fram í London. Að sjálfsögðu vonum við að okkar fólki gangi sem best.
Oddleifur, Ástrós og Aðalsteinn.
Í kvöld keppir FAS við lið MH í Gettu betur. Þetta er í þrítugasta og annað sinn sem keppnin er haldin en 27 skólar skráðu sig til þátttöku að þessu sinni.
Lið FAS er skipað þeim Aðalsteini Gunnarssyni, Ástrós Anítu Óskarsdóttur og Oddleifi Eiríkssyni og leggst keppnin nokkuð vel í þau.
Viðureignin á milli skólanna hefst klukkan 20:30 í kvöld og verður útvarpað á Rás 2. Við hvetjum alla til að stilla viðtækin á Rás 2 og hlusta á þau spreyta sig.
Að sjálfsögðu óskum við okkar fólki góðs gengis.
