Það má með sanni segja að félagslíf skólans hafi verið í miklum blóma á þessu hausti þar sem hver viðburðurinn rekur annan. Í þessari viku stendur Nemendafélag FAS fyrir röð viðburða sem krakkarnir hafa kosið að kalla Oktoberfest.
Fyrsti viðburðurinn verður í kvöld, 23. október. Það er málfundafélagið sem stendur fyrir fótboltakvöldi í Nýheimum. Húsið opnar klukkan 18:40 og klukkan 19:00 er komið að risaleik en það eru stórliðin Manchester United og Juventus sem eigast við. Hægt verður að tippa á úrslit leiksins og eru vegleg verðlaun í boði.
Miðvikudagskvöldið 24. október stendur fornbílaklúbbur FAS fyrir spurningakeppni eða bíla quiz eins og klúbburinn kallar viðburðinn sem verður í Nýheimum og hefst klukkan 20:00 og stendur yfir í tvo tíma. Boðið verður upp á kóla gosdrykk og kex og kökur.
Fimmtudagskvöldið 25. október er síðan komið að Karaoke kvöldi í umsjá viðburðaklúbbs. Sá atburður verður haldinn í Ungmennahúsi (Þrykkjunni) og stendur frá 20:00 – 22:00. Þar verður boðið upp á popp og kóla gosdrykk.
Það kostar 1000 krónur inn fyrsta kvöldið en 500 krónur hin kvöldin. Það er hægt að kaupa sig inn á alla viðburðina og fá þá 500 krónu afslátt. Miðasala er á skrifstofu Nemendaráðs.
Á laugardaginn má svo segja að það sé komið að rúsínunni í pylsuendanum en þá ætlar nemendafélagið að standa fyrir markaði og kaffihúsi í Nýheimum. Þar verður hægt að skoða föt, bækur og ýmis konar gjafavöru og einnig verður hægt að kaupa kaffi og kruðerí. Markaðurinn verður opinn á milli 13:00 og 16:00 á laugardag og vonast nemendafélagið til að sem flestir komi.
Unnið að jákvæðnirefli í FAS.
Í dag var komið að uppbroti númer tvö í skólanum en þá fellur niður kennsla í eina klukkustund og nemendur fást við eitthvað allt annað. Í dag voru nemendur að vinna með hugtakið jákvæðni. Allt of oft ber á neikvæðni hjá mörgum þegar á að takast á við verkefni. Það verður þá oft erfitt að koma sér að verki og oftar en ekki verður verkefnið illa unnið eða jafnvel ekki. Það skiptir miklu máli að tileinka sér jákvæðni í verkefnum dagsins og leita lausna svo að vinnan verði skemmtileg og um leið auðveldari.
Hugmyndin með vinnunni í dag var að koma jákvæðni á blað þar sem allir nemendur myndu leggja eitthvað á vogarskálarnar. Það geti verið bæði í máli og myndum. Það var unnið í nokkrum stórum hópum og fékk hver hópur stóran pappírsrenning. Saman eiga pappírsrenningarnir að mynda refil sem verður hengdur upp í skólanum. Með því að búa til refil er verið að vísa til gamallar hefðar um varðveislu mynda.
Munum svo öll að hafa jákvæðni að leiðarljósi!
Dagana 9. – 12. október, voru fjallamennskunemar í námskeiðinu Gönguferð 2. Námskeiðið er seinni hluti verklegrar kennslu í áfanganum Gönguferðir. Áherslan í þessari törn var á að læra á notkun GPS tækja, GPS forrita í síma, þverun straumvatna og halda áfram með þá hluti sem nemendurnir kynntust í Gönguferð 1 í lok ágúst.
Fyrsti dagur námskeiðsins fór í að kynnast staðsetningartækjum og skipuleggja tveggja daga gönguferð um Reyðarárdal og Össurárdal. Dagar tvö og þrjú fóru svo í að framkvæma gönguferðina. Fyrri daginn lék veðrið við hópinn, en um nóttina og seinni daginn fékk hópurinn slagveðursrigningu. Sumir sváfu illa í veðurofsanum um nóttina, en allir komu þó með bros á vör til byggða, þrátt fyrir að ekki væri þurr þráður á sumum.
Fjórði dagurinn fór svo í að læra þverun straumvatna. Byrjað var á stuttum fyrirlestri um straumvötn, en svo klæddi hópurinn sig svo upp í þurrgalla og björgunarvesti og skellti sér í æfingar í Laxá í Nesjum. Þar æfðu nemendur sig í að vaða ár með mismunandi aðferðum, synda í land ef vaðið reyndist of erfitt og síðast en ekki síst bjarga fólki á sundi, með notkun kastlínu.
Fyrirtækið Iceguide sá hópnum fyrir búnaði og er virkilega ánægjulegt að fyrirtæki í heimabyggð styðji við námið með svona öflugum hætti og færum við þeim kærar þakkir fyrir. Eins og á fyrra námskeiði sáu Ástvaldur Helgi Gylfason og Sigurður Ragnarsson um kennsluna.
[modula id=“9764″]
Erasmus+ verkefnið ADVENT sem FAS er í forsvari fyrir snýr að því að efla nám og nýsköpun í afþreyingarferðaþjónustu.
Fyrsta námskeiðið af níu sem hönnuð verða var prufukeyrt í Fort William í Skotlandi 8. – 10. október síðastliðinn. Á námskeiðinu kynntust þátttakendur því hvernig markvisst er hægt að nýta útivist og þær áskoranir sem þar er hægt að finna til að bæta andlega og félagslega líðan. Þrír þátttakendur frá íslenskum ferðaþjónustufyrirtækjum tóku þátt og átta frá samstarfsþjóðunum Finnlandi og Skotlandi.
Þátttakendur upplifðu hin margvíslegustu ævintýri á námskeiðinu auk þess að fá innsýn í fræði “Adventure Therapy”. M.a. var farið í sjósund, fjallgöngu, gist var í afskekktum fjallakofa og gengið yfir „vírabrú“.
Í kjölfar námskeiðsins fjölgaði í íslenska hópnum sem tók þátt í verkefnafundi og fjölmennri ráðstefnu um útivist og leiðir til að auka almenna vellíðan, “Adventure Therapy”. Á ráðstefnunni var vefsíða verkefnisins formlega opnuð.
Næstu námskeið ADVENT verð haldin í Finnlandi í nóvember og á Íslandi í janúar. Þar og á næstu mánuðum verða spennandi tækifæri fyrir aðila í afþreyingarferðaþjónustu til að prófa nýjar leiðir og sinna endurmenntun innan fyrirtækjanna.
[modula id=“9761″]
Dagana 1.- 5. október fór fram námskeiðið Klettaklifur 2, sem er framhaldsnámskeið af námskeiðinu sem haldið var fyrir tveimur vikum.
Í þessari viku var áherslan á að kynnast sem flestum tegundum klettaklifurs. Á síðasta námskeiði kynntust krakkarnir sportklifri á Hnappavöllum, en auk þess lærðu þau núna svokallaða grjótglímu í steinunum við Vestrahorn og fengu kynningu á dótaklifri og fjölspannaklifri. Ekki lét hópurinn þar við sitja heldur eyddi nokkrum tíma í að síga og júmma (í myndaalbúminu er mynd af júmmi) eins og það er kallað ásamt því að nota bergtryggingar og læra grunnatriði í línuvinnu.
Veðrið reyndist hópnum erfitt þessa vikuna og ekki tókst að gista í tjaldi á Hnappavöllum eins og til stóð, en þess í stað var námskeiðið keyrt frá Höfn og farið kletta í nágrenninu. Staðirnir sem heimsóttir voru, voru; Vestrahorn, Hnappavellir, Geitafell, og Hellisholt. Enn og aftur þökkum við landeigendum fyrir að leyfa okkur að nota þessar klettaperlur hér í nágrenni við Höfn til kennslu.
Þess má svo til gamans geta að Hnappavellir og svæðið í og við Vestrahorn eru tvö af bestu klifursvæðum landsins. Kennarar á þessu námskeiði voru Árni Stefán Haldorsen og Sigurður Ragnarsson.
[modula id=“9763″]
FAS fékk nýlega styrk frá Erasmus+ fyrir verkefni sem kallast Cultural heritage in the context of students’ careers eða Nemendur skapa verkefni byggð á menningararfleifð og er verkefnið er til tveggja ára. Ætlunin er að vinna verkefni um menningararfleifð þjóðarinnar og á það jafnframt að tengjast menningartengdri ferðaþjónustu. Unnið er í samvinnu við fjóra skóla í jafn mörgum löndum frá Ítalíu, Grikklandi, Eistlandi og Litháen. Þetta eru sömu skólar og FAS vann með í síðasta Erasmus+ verkefni.
Unnið er í smiðjum í hverju landi þar sem hver þjóð leggur áherslu á menningu sína. Nemendur heimsækja síðan hvert land og kynnast verkefnum hverrar smiðju og læra og taka þátt í viðfangsefnum hverrar þjóðar.
Markmiðið með Nemendur skapa verkefni byggð á menningararfleið er að hvetja nemendur og kennara að vinna verkefni úr eigin menningu sem kynningu fyrir nemendur frá öðrum Evrópuríkjum og styrkja og skapa tengsl milli þjóða í Evrópu. Á þessum tveimur verkefnisárum verða framtíðarmöguleikar kynntir fyrir nemendum okkar með því að hjálpa þeim að búa til leiðsögn sem sameinar sérkenni, sögu og náttúru hvers lands. Nemendur skapa því menningarferðalag í hverri smiðju þar sem þjóðsögur, sögusagnir og náttúra hverrar þjóðar eru meginviðfangsefnin.
Umsjón með verkefninu fyrir hönd FAS hefur Stefán Sturla umsjónarmaður Lista- og menningarsviðs skólans.
