Katrín Magnúsdóttir og Eyjólfur Guðmundsson staðfesta þátttöku FAS í Grænfánaverkefninu.
Um miðjan ágúst var námskeið fyrir kennara í FAS. Viðfangsefni námskeiðsins var þema skólaársins sem er neysla og væntanleg þátttaka skólans í verkefni sem kallast Skólar á grænni grein (Eco-Schools), stundum líka kallað Grænfánaverkefnið. Það var Katrín Magnúsdóttir verkefnastjóri hjá Landvernd sem sá um námskeiðið.
Skólar á grænni grein er alþjóðlegt verkefni sem miðar að því að gera þátttakendur fróðari og meðvitaðri um sjálfbærni og umhverfisvernd. Þátttakendur í námskeiðinu skoðuðu mögulega útfærslu á verkefninu þannig að það myndi nást sem bestur árangur í FAS. Það er líka verðugt verkefni að gera alla meðvitaðari um neyslu sína. Það er fátt mikilvægara í dag en að fá fleiri til að draga úr neyslu og minnka sóun. Frekar þarf að huga að endurnýtingu og finna allar mögulegar leiðir til að minnka vistspor sitt. Og þar skipta öll litlu skrefin máli.
Skólar á grænni grein fylgja sjö skrefa ferli sem efla vitund nemenda og starfsmanna allra um umhverfismál. Ef skólinn nær markmiðum sínum fær hann að flagga grænfánanum til tveggja ára og fæst sú viðurkenning endurnýjuð ef skólarnir halda áfram góðu starfi. Nú þurfum við í FAS að taka höndum saman og ná settu marki.
Þessir piltungar tóku vel til matar síns.
Í þriðja og fjórða tíma í dag féll hefðbundin kennsla niður og allir nemendur skólans tóku þátt í ratleik. Þessi leikur var fyrst og fremst til heiðurs nýnemum og viljum við á þann hátt bjóða þá velkomna í skólann. Eldri og yngri nemendum var blandað saman í hópa og hver hópur þurfti að leysa ýmsar þrautir bæði innan húss og utan. Fyrir hverja leysta þraut fá nemendur stig. Sá hópur sigrar sem safnar flestum stigum. Kristján íþróttakennari hafði yfirumsjón með leiknum og mun á næstunni reikna út stigin og tilkynna hverjir báru sigur úr bítum.
Að ratleiknum loknum bauð skólinn upp á grillaða hamborgara og runnu þeir ljúflega niður.
Skólastarf haustannarinnar hófst formlega í FAS í morgun með skólasetningu og í kjölfarið voru umsjónarfundir. Þar fengu nemendur helstu upplýsingar sem varða námið. Þeir sem ekki komust í dag geta skoðað stundatöfluna sína inni á INNU. Þar er einnig að finna upplýsingar um námsefni í hverjum áfanga.
Kennsla hefst svo í fyrramálið samkvæmt stundaskrá. Við leggjum mikla áherslu á að nemendur mæti vel og vinni jafnt og þétt. Þannig næst bestur árangur.
Ef það skyldu enn vera einhverjir að velta fyrir sér að fara í nám að þá er þeim bent á að skoða áætlun um námsframboð hér. Tekið er við skráningum í nám til og með 26. ágúst og umsóknareyðublað er á finna á heimsíðu skólans.
Nú er skólastarfi vorannarinnar að ljúka og starfsmenn að tínast í sumarfrí. Skrifstofa skólans verður lokuð frá 19. júní til 7. ágúst.
Skólastarf haustannar hefst formlega með skólasetningu þann 20. ágúst klukkan 10 í fyrirlestrasal Nýheima. Í kjölfarið verður umsjónarfundur þar sem verður farið mikilvægustu skipulagsatriði annarinnar. Kennsla hefst svo samkvæmt stundaskrá 21. ágúst.
Upplýsingar um bækur og námsgögn er að finna í Innu og einnig í kennsluáætlunum fyrir hvern áfanga.
Enn er tekið við skráningum í skólann. Skráingarblað og upplýsingar um námsframboð er á vef skólans. Ef nauðsyn ber til er hægt að hafa samband við skólameistara. Netfang hans er eyjo@fas.is og símanúmer 860 29 58.
Bestu óskir um gleðilegt og gott sumar.
Útskrift frá FAS 2019.
Í dag fór fram útskrift frá FAS. Að þessu sinni útskrifuðust 20 stúdentar, einn nemandi lýkur námi í fjallamennsku, tveir nemendur ljúka framhaldsskólaprófi, einn útskrifast af fisktæknibraut, einn nemandi útskrifast úr tækniteiknun og einn nemandi lýkur A stigi vélstjórnar.
Nýstúdentar eru: Aleksandra Wieslawa Ksepko, Arnar Ingi Jónsson, Arndís Ósk Magnúsdóttir, Birkir Atli Einarsson, Birkir Fannar Brynjúlfsson, Brandur Ingi Stefánsson, Bryndís Arna Halldórsdóttir, Díana Sóldís Einarsdóttir, Guðrún Ása Aðalsteinsdóttir, Halldór Hrannar Brynjúlfsson, Hákon Guðröður Bjarnason, Íris Björk Rabanes, Ísar Svan Gautason, Kristján Vilhelm Gunnarsson, Óttar Már Einarsson, Sóley Lóa Eymundsdóttir, Svandís Perla Snæbjörnsdóttir, Sævar Ingi Ásgeirsson, Viktor Örn Einarsson og Wiktoria Anna Darnowska.
Sigjón Atli Ragnheiðarson lýkur námi í fjallamennsku. Kolbeinn Benedikt Guðjónsson og Kristofer Hernandez útskrifast af framhaldsskólabraut. Katrín Soffía Guðmundsdóttir útskrifast af fisktæknibraut. Helga Sveinbjörnsdóttir lýkur námi í tækniteiknun og Þórir Kristinn Olgeirsson lýkur A stigi vélstjórnar.
Bestum árangri á stúdentsprófi að þessu sinni náði Arndís Ósk Magnúsdóttir.
Starfsfólk FAS óskar útskriftarnemendum öllum til hamingju með áfangann og óskar þeim gæfu og gengis í framtíðinni.
Í þrjá áratugi hefur Félag þýzkukennara staðið fyrir nokkurs konar stöðuprófi sem kallast þýskuþraut og er þrautin í samvinnu við Þýska sendiráðið. Tilgangurinn er að vekja athygli á og auka veg þýskunnar. Nemendum sem hafa náð ákveðnu stigi í tungumálanáminu stendur til boða að taka þátt í þessari þraut. Í gegnum tíðina hafa þó nokkrir nemendur í FAS spreytt sig á þrautinni og mörgum hefur gengið ágætlega.
Þegar þrautin var lögð fyrir á þessari önn ákvað Ingunn Ósk Grétarsdóttir að vera með. Það var heldur betur góð ákvörðun því að hún gerði sér lítið fyrir og vann þrautina sem er náttúrulega frábært. Tvö efstu sætin í þrautinni fá í verðlaun fjögurra vikna dvöl í Þýskalandi. Fyrstu tvær vikurnar er dvalið hjá fjölskyldum og gengið í skóla þar sem að sjálfsögðu er verið að tala og læra þýsku. Hinar tvær vikurnar er ferðast vítt og breitt um Þýskaland þar sem þýsk menning og daglegt líf í landinu er í öndvegi.
Í fyrradag stóðu Félag þýzkukennara og sendiráðið fyrir uppskeruhátíð þýskunnar. Þar voru veittar viðurkenningar fyrir 20 efstu sætin í þýskuþrautinni og eins fyrir stuttmyndakeppni sem haldin er ár hvert. Að sjálfsögu mætti Ingunn Ósk þangað til að taka á móti viðurkenningu. Það var þó ekki eina erindið hennar til Reykjavíkur því í leiðinni tók hún grunnpróf á saxófón. Það verður því nóg um að vera hjá Ingunni Ósk næstu vikurnar og mánuðina. Hún fer í Þýskalandsreisuna um 20. júní og svo fær hún í september tækifæri til að æfa með Ungsveit Sinfóníuhljómsveitar Íslands eins og við höfum áður greint frá.
Við óskum Ingunni Ósk til hamingju með þennan frábæra árangur og vonum að allt gangi sem best í hennar verkefnum á næstunni.
Nánar er sagt frá uppskeruhátíðinni á fésbókarsíðu Þýska sendiráðsins.
[modula id=“9782″]
