Það var vel mætt á aðventuverð í Nýheimum í hádeginu. Að frumkvæði FAS var efnt til sameiginlegs málsverðar fyrir íbúa Nýheima og aðstandendur nemenda. Tilefnið var að fá fólk til að hittast og ræða um FAS og hlutverk skólans í samfélaginu og um leið að spjalla saman.
Hún Hafdís okkar í teríunni sá um matseldina og naut aðstoðar Lindu. Það er varla réttnefni að tala um máltíð því eftir gestunum beið dýrindis hlaðborð með alls kyns gómsætum réttum eins og Dísu er einni lagið. Það var líka tekið hraustlega til matarins.
NemFAS hvatti alla til að mæta í jólapeysum í dag og reynt var að leggja mat á fegurð þess klæðnaðar. Veitt voru verðlaun fyrir fallegustu og ljótustu jólapeysur dagsins.
Það var mjög ánægjulegt að sjá hversu margir sáu sér fært að mæta og það var samdóma álit að samveran, spjallið og ekki síst maturinn hefði verið frábær og þetta væri vonandi viðburður kominn til að vera.
-
Konurnar að baki kræsinganna, Dísa og Linda.
-
Guðrún Ása var ekki jafn kát með sín verðlaun fyrir ljótustu jólapeysuna en líklega var það fótboltamerkið á peysunni sem gerði útslagið.
-
Siggi fékk verðlaun fyrir flottustu jólapeysuna og var að vonum kátur.
-
Eyjólfur býður gesti velkomna.
-
Hluti gestanna var í jólapeysum.
-
Dísa gætir að því að allt sé eins og það á að vera.
