Fyrir margt löngu var margs konar samstarf á milli framhaldsskólanna á Austulandi. Þar á meðal voru Austfirsku Ólympíuleikarnir þar sem nemendur skólanna hittust og áttu góðar stundir saman í alls konar leikjum. Þessi viðburður lagðist af fyrir mörgum árum en það hefur þó alltaf verið talað um af og til að endurvekja hann. Forsvarsmenn nemendafélaganna í ME, VA og FAS hafa unnið að því í vetur og nú tókst að endurvekja þessa gömlu leika og þeir voru haldnir í gær, miðvikudag.
Stór hluti staðnemenda í FAS ásamt nokkrum kennurum lögðu af stað í gærmorgun með rútu til Egilsstaða þar sem leikarnar fóru fram að þessu sinni. Keppt var í blaki, fótbolta og körfubolta og voru spilaðir þrír leikir í hverri íþrótt. Þeir sem ekki tóku þátt í keppnum mynduðu stuðningslið FAS og létu óspart í sér heyra. Eftir mót bauð ME upp á hamborgara og á meðan á borðhaldi stóð var spilað Kahoot. Nemendur eru sammála um að ferðin hafi verið mjög skemmtileg og gaman að hitta nemendur úr hinum skólunum.
Áður en haldið var heim í gær var komið við á veitingastaðnum Aski þar sem hópurinn gæddi sér á pizzum og voru þeim gerð góð skil. Það var ánægður hópur sem kom til baka á Höfn um kvöldmatarleytið í gær. Og nú er búið að ákveða að næstu ólympíuleikar verði haldnir á Höfn.
-
Blakmót.
-
Blakmót.
-
Fótbolti.
-
Fótbolti.
-
Stuðningslið FAS.
-
Körfubolti.
-
Körfubolti.
-
Kahoot keppni í ME.
-
Kahoot keppni í ME.
-
Kahoot keppni í ME.
-
Pizzahlaðborð á Aski.
-
Pizzahlaðborð á Aski.
