Nú hefur komið upp smit á Höfn og við ætlum að bregðast við því í FAS með því að nota grímur í skólanum. Nemendur og starfsfólk fæ
r afhentar grímur þegar þau mæta í skólann á morgun og verða að bera þær á meðan verið er í skólanum. Þar sem mælt er með að einnota grímur séu einungis notaðar í fjóra tíma fá allir nýjar grímur í hádeginu. Notuðum grímum á að henda í almennt rusl og mikilvægt er að þvo og sótthreinsa hendur áður en nýjar grímur eru settar upp.
Allir eiga að nota aðalinnganginn, Nettómegin. Þá viljum við hvetja alla til að forðast óþarfa umgang og lágmarka neyslu á mat og drykk.
Í einhverjum áföngum verður tekin upp fjarkennsla og fá nemendur upplýsingar um það frá viðkomandi kennurum.
Okkur í FAS finnst mikilvægt að hægt sé að halda úti sem eðlilegustu skólastarfi og því hvetjum við alla til að fara að reglum og huga að eigin sóttvörnum. Ef við pössum okkur öll eru líkur á að þetta ástand vari stutt.
Hér eru leiðbeiningar um hvernig nota skal grímur rétt.
Skólastarf haustannarinnar hófst formlega í morgun með skólasetningu. Nú miðast allt skólastarf við að fylgja reglum varðandi COVID-19 og hafa verið gerðar ráðstafanir þar að lútandi í skólanum. Mikilvægast er að halda eins metra fjarlægðarmörkum og fylgja fyrirmælum um hreinlæti. Það er búið að hengja upp leiðbeiningar frá Landlæknisembættinu víða um skólann og eru allir hvattir til að lesa þær.
Margir eldri nemendur sem á vorönninni upplifðu að skólastarf færðist allt yfir í fjarnám höfðu á orði hvað það væri gott að geta mætt aftur í skólann. Það er sameiginlegt verkefni okkar allra að fylgja sem best settum reglum svo skólastarf verði sem eðlilegast.
Kennsla hófst svo eftir hádegið svo nú má segja að allt sé komið á fulla ferð í skólanum.
Skólasetning verður í FAS á morgun klukkan 10. Allir sem vilja geta mætt en mikilvægt er að nýnemar mæti. Umsjónarfundur hefst klukkan 10:30 og þar eiga nemendur að mæta.
Hér er slóðin https://www.youtube.com/watch?v=PQkRzghd2Pc
Kennsla hefst svo samkvæmt stundaskrá klukkan 13 á morgun.
Skólastarf haustannar hefst fimmtudaginn 20. ágúst klukkan 10 með skólasetningu í fyrirlestrasal Nýheima. Setningunni verður streymt en mikilvægt er að nýnemar mæti. Umsjónarfundur hefst klukkan 10:30 í stofum fyrir staðnemendur og þá sem eru um óreglulega mætingu. Fjarnemendur fá fundarboð í gegnum Teams.
Sama dag klukkan 13 hefst kennsla samkvæmt stundaskrá og er miðað við að kennsla fari fram í stofum með hefðbundnum hætti þó að teknu tilliti til eins metra reglunnar. Ekki er komin útfærsla á öllu verklegu námi en þær upplýsingar verða birtar um leið og þær liggja fyrir. Stundatöflur og bókalistar eru nú þegar aðgengilegar í Innu og hægt er að skoða kennsluáætlanir einstakra áfanga á vef skólans. Í byrjun næstu viku koma nánari upplýsingar um nýjan námsvef FAS og aðgang að Office 365.
Við hér í FAS búum við þær aðstæður að það er tiltölulega auðvelt að viðhafa eins metra fjarlægð á milli fólks og að aldrei séu fleiri en 100 manns í sama rými.
Nemendur á heimavist geta mætt 19. ágúst en þurfa að hafa samband við skólameistara til að komast inn.
Við hlökkum til að sjá ykkur og vonum að skólastarfið fari vel af stað þrátt fyrir aðstæður vegna COVID-19.
Boðið verður upp á sex mismunandi námskeið í sértæku sumarnámi í FAS. Því er ætlað að koma til móts við aðstæður á vinnumarkaði í kjölfar COVID-19. Þetta eru framsækin, áhugaverð og hagnýt námskeið í frjóu umhverfi. Tveir áfangar eru hefðbundið framhaldsskólanám, einn áfangi er sérstaklega hugsaður fyrir nemendur sem hafa annað móðurmál en íslensku. Tveir áfangar tilheyra list- og verkgreinum en það eru sjónlist og saga annars vegar og kvikmyndagerð hins vegar þar sem áherslan er á upptökur og eftirvinnslu á hljóð- og myndefni. Þá er boðið upp á kynningaráfanga fyrir fjallamennskunám FAS.
Það er mismunandi hvenær áfangarnir eru í boði og einnig er mismunandi hvort þeir eru í staðnámi eða fjarnámi. Umsóknarfrestur fyrir alla áfanga er til 10. júní n.k. Nánari upplýsingar er að finna hér
Það eru margir skólar sem bjóða upp á alls konar nám vegna þessara sérstöku aðstæðna. Sjá nánar hér
Eins og margir vita tekur FAS þátt í mörgum erlendum samstarfsverkefnum og vegna COVID-19 hefur þurft að gera breytingar. Sumum verkefnum átti að ljúka á þessari önn. Hér er yfirlit yfir þau verkefni sem eru í gangi og hvernig er ráðgert að bregðast við til að hægt sé að vinna það sem áætlað var.
Promount – Increased professionalism in mountaineering education
Tveggja vikna námsferð þriggja nemenda og þriggja kennara í Fjallamennskunámi FAS var fyrirhuguð til Skotlands í mars sl. Námsferðin er styrkt af Erasmus+ og var ætlunin að taka þátt í fjallamennsku- og útivistanámi í The University of the Highlands and Islands /The School of Adventure Studies. Ekkert varð af þessari ferð vegna COVID-19 en stefnt er að því að fara í þessa námsferð á haustdögum.
Advent – Adventure tourism in vocational education and training
Advent er þriggja ára menntaverkefni sem FAS hefur leitt og er unnið í samstarfi við Skotland og Finnland. Greint hefur verið frá þessu verkefni á síðu FAS en meginmarkmið þess er að efla menntun á sviði ævintýraþjónustu jafnt í skólum sem úti á vettvangi með starfandi aðilum í greininni. Verkefninu átti að ljúka formlega með alþjóðlegri ráðstefnu hér í Nýheimum 5. júní n.k. en vegna COVID-19 var henni frestað til 6. nóvember.
Detour – Destinations: Wellbeing Tourism Opportunities for Regions
Detour er nýtt tveggja ára Erasmus+ verkefni sem FAS er þátttakandi í ásamt Skotum, Írum, Slóvenum og Portúgölum. Þetta verkefni fjallar um heilsueflandi ferðaþjónustu, menntun og stafræna markaðssetningu. COVID-19 hefur sett strik í reikning þessa verkefnis líka því fella hefur þurft niður vinnufundi þar sem þátttakendur ætluðu að hittast til að vinna að verkefninu. Vinnan hefur í staðinn farið fram í gegnum netið og hefur gengið ágætlega. Vonir standa til að hópurinn muni hittast á haustdögum.
Cultural heritage in the context of students´careers
Cultural heritage er tveggja ára Erasmus+ verkefni sem FAS hefur tekið þátt í með Eistlandi, Lettlandi, Grikklandi og Ítalíu. Einhverjir muna væntanlega eftir þeim fríða hópi sem heimsótti okkur hér á Höfn síðastliðið haust, en þá var smiðja verkefnisins staðsett á Íslandi. Áætlað var að ljúka verkefninu núna í vor með síðustu skólaheimsókninni til Lettlands. Vegna COVID-19 frestast sú ferð um óákveðinn tíma en vonir standa til að hægt verði að fara í þá ferð í haust.
Geoheritage, culture and sustainable communities in rural areas in Finland, Iceland and Norway
Þetta er nýjasta verkefnið í FAS og er styrkt af Nordplus áætluninni. Verkefnið er til þriggja ára og auk skóla í löndunum þremur koma jarðvangar og þjóðgarðar að því. Fyrsta heimsóknin er ráðgerð til Íslands í september en á þessari stundu er ekki ljóst hvort hægt er að halda þeirri áætlun.
