Fyrri lokaferð fjallamennskunáms FAS var farin á dögunum 3. – 9. maí síðastliðinn. Ferðin heppnaðist með eindæmum vel og völdu nemendurnir sér mjög áhugaverð og viðeigandi verkefni. Fyrst var gengið frá Núpsstaðaskógi í Skaftafell á þremur dögum. Gengið var upp með Núpsá, í gegnum Núpstaðaskóg og upp bratt Skessutorfugljúfrið. Þá var gist á Eggjum, nálægt Skeiðarárjökli. Daginn eftir var hinn mikli Skeiðarárjökull þveraður og tjaldað undir Færneseggjum, á tjaldsvæði sem hefur oft verið nefnt Svalirnar. Það er hæglega hægt að segja að þar er um að ræða eitt einstakasta tjaldsvæði landsins. Á degi þrjú gengum við upp Skaftafellsfjöll á Blátind (1177 m) og þá niður í Bæjarstaðaskóg og yfir Morsárdal í Skaftafell.
Eftir gönguna var tekinn hvíldardagur til að undirbúa sig fyrir næsta verkefni. Leigður var bíll frá Local Guide, ekið inn í Kálfafellsdal og gengið upp hina spennandi leið á Þverártindsegg. Gangan gekk vel og var mikið fagnað við að ná að klífa þennan fallega tind.
Það var erfitt að skilja við hópinn eftir frábæran vetur, en nemendur hafa myndað þétt vinatengsl eftir ævintýri ársins. Þetta er sannarlega sterkur útskriftarhópur og það verður gaman að sjá hvað þau munu taka sér fyrir hendur í fjallamennsku í framtíðinni.
Ástvaldur Gylfason, Elín Lóa og Íris Ragnarsdóttir.
[modula id=“12824″]
Í dag fór fram útskrift frá FAS. Að þessu sinni útskrifast 15 stúdentar og einn nemandi útskrifast af starfsbraut.
Nýstúdentar eru: Ásdís Ögmundsdóttir, Axel Elí Friðriksson, Björgvin Freyr Larsson, Guðbjörg Ómarsdóttir, Harpa Sigríður Óskarsdóttir, Helga Lára Kristinsdóttir, Ingunn Ósk Grétarsdóttir, Íris Mist Björnsdóttir, Júlíus Aron Larsson, Katrín María Sigurðardóttir, María Romy Felekesdóttir, Nejira Zahirovic, Selma Mujkic, Sigurður Guðni Hallsson og Vigdís María Geirsdóttir.
Írena Þöll Sveinsdóttir útskrifast af starfsbraut.
Bestum árangri á stúdentprófi að þessu sinn nær Ingunn Ósk Grétarsdóttir sem fær 10 í meðaleinkunn og er þetta í fyrsta skipti í sögu skólans sem nemandi nær þessum árangri.
Starfsfólk FAS óskar útskriftarnemendum öllum til hamingju með áfangann og óskar þeim velfarnaðar í framtíðinni.
Grunnnámskeið FAS í fjallahjólum var haldið dagana 6. – 9. og 14. – 17. maí hjá Bikefarm. Leiðbeinendur á námskeiðinu voru Guðmundur Fannar Markússon, Sigfús Ragnar Sigfússon og Svanhvít Helga Jóhannsdóttir. Markmið námskeiðsins var að nemendur öðluðust grunn í tækni, meðferð og viðhaldi á fjallahjólum. Námskeiðin voru haldin í höfuðstöðvum Bikefarm í Mörtungu 2 í Skaftárhreppi en í landi býlisins eru hjólastígar sem henta vel til fjallahjólreiða.
Á fyrsta degi töluðum við um væntingar hvers og eins til námskeiðsins. Nemendur lærðu fyrst að stilla hnakk, bremsur og loftþrýsting bæði í dekkjum og dempurum fyrir sína stærð og þyngd. Eftir það var farið yfir æskilega líkamsstöðu á hjólinu bæði þegar hjólað er upp í móti og eins niður í móti. Eftir hádegismat var farið út að æfa stöðu og jafnvægi á hjólinu og gírskiptingar. Þá var haldið í stutta hjólaferð þar sem tækifæri gafst á að nýta öll þau tækniatriði sem farið hafði verið yfir fyrr um daginn. Deginum lauk á kennslu á þrifum á hjólunum og frágangi.
Annar dagur fór í fimi- og jafnvægisæfingar á hjólunum, t.d. að lyfta framdekki yfir hindrun og hjóla eftir planka. Eftir hádegi hjóluðum við góðan spöl og æfðum þverun minniháttar straumvatns með hjól. Næst var farið í bremsuæfingar í bratta og svo skemmtum við okkur konunglega að hjóla aftur heim.
Á þriðja degi var haldið í hjólaferð og öllum deginum eytt úti um koppa og grundir. Þá settu nemendur sig í karakter og leiðsögðu hvoru öðru til skiptis yfir daginn.
Fjórði dagurinn fór alfarið í að læra á viðgerðir og viðhald og búnaðarspjall bæði fyrir eigin ferðir og sem hjólaleiðsögumaður. Allir prófuðu að skipta um dekk og splæsa sundur og saman hlekk í keðju. Farið var yfir stillingar á gírskipti, að skipta um bremsupúða og annað almennt viðhald. Allir dagar enduðu á stuttu spjalli um daginn þar sem hver og einn ræddi það sem viðkomandi var ánægður með eða annað sem við vildum gera betur. Í lok námskeiðs ræddum við námskeiðið í heild, hvort væntingar okkar hefðu orðið að veruleika og hvort eitthvað hefði mátt betur fara.
[modula id=“12797″]
Laugardaginn 22. maí verður útskrift frá FAS. Vegna takmarkanna á því hversu margir mega koma saman verða einungis útskriftarnemendur og gestir þeirra viðstaddir athöfnina. Þeir munu sitja við merkt borð á Nýtorgi. Athöfnin hefst klukkan 14.
Það mun verða streymt frá útskriftinni til að þeir sem ekki komast geti fylgst með. Slóðin á streymið er Framhaldsskólinn í A.-Skaft. – YouTube.
Þetta verður þó ekki eina útskriftin frá FAS á þessu ári því laugardaginn 19. júní verður útskrift úr Fjallamennskunáminu. Við munum segja betur frá þeirri útskrift þegar nær dregur.
Í dag klukkan 14 opnar sýning í Nýheimum. Þar sýna nemendur í sjónlistum á listasviði FAS sýnishorn af vinnu annarinnar. Þetta eru fjölbreytt verkefni, t.d. myndlistarverkefni, textílverkefni og síðast en ekki síst förðunarverkefni. Kennslan í sjónlistum fer fram í Vöruhúsinu og er kennt bæði í saumastofu og listastofu. Nemendur í sjónlistum eru á fyrsta, öðru og þriðja hæfniþrepi og verkin á sýningunni endurspegla hæfniþrepin.
Sýningin er á báðum hæðum og við hvetjum fólk til að koma á efri hæðina til að skoða verkefnin.
