Þó að í dag sé síðasti kennsludagur annarinnar er nóg um að vera. Nokkrir nemendur sem eru komnir vel áleiðis í námi flytja lokaverkefnin sín í áfanganum VERK3VR05 en að margra mati er það einn mikilvægasti áfanginn sem nemendur taka í FAS. Þá eru allir nemendur uppteknir af því að ljúka vinnu í hverjum áfanga og skila inn námsmöppum.
Þennan síðasta kennsludag bauð skólinn nemendum og starfsfólki í hádegismat og þar var flest það á boðstólum sem alla jafnan er að finna á borðum landsmanna á jólum. Eins og svo oft áður töfraði hún Dísa okkar fram dýrindis kræsingar og voru þeim gerð góð skil.
Á morgun byrjar svo lokamat. Staðnemendur mæta í stofu en fjarnemendur fá fundarboð á Teams. Allir eiga að geta séð tímasetningar fyrir lokamat í áföngum sínum á Námsvef.
Við óskum öllum góðs gengis í þessum síðustu verkum annarinnar.
Nú hefur verið sett upp á Nýtorgi sýning þar sem sjá má afrakstur annarinnar hjá nemendum í list- og verkgreinum. Verkefni nemenda koma núna einkum frá áföngum í sjónlist og skapandi greinum. En að auki eru kenndir áfangar í kvikmyndun, ljósmyndun og sviðslistum.
Þá er kynning á verkefnum nemenda í hestamennsku í FAS en það nám hófst í haust.
Sýningin verður opin allan desembermánuð og hvetjum við alla að líta við í Nýheimum og skoða skapandi verk nemenda FAS.
Það hefur legið fyrir um nokkurt skeið að ríkisstofnanir færist yfir á Menntaský en þar er þjónusta fyrir alla þá sem nota Office 365.
Föstudaginn 3. desember er komið að því að færa kerfin okkar í FAS yfir á Menntaskýið. Eftir klukkan 14 verður ekki hægt að vinna í kerfunum okkar. Þið getið ekki farið inn á Office 365, Námsvef og Innu. Gert er ráð fyrir að yfirfærslan taki um einn sólarhring.
Á laugardag eiga kerfin okkar að vera komin í lag. Þá eiga nemendur að geta skráð sig inn á þau. Hér eru leiðbeiningar þar sem farið er yfir innskráningaferli: Leiðbeiningar vegna OneDrive og tvíþátta auðkenningar í Menntaský. Athugið að nemendur nota ekki MFA (MargFöld Auðkenning / Tvíþátta auðkenningu) og geta því sleppt þeim hluta sem að því snýr í leiðbeiningunum. Mikilvægt er að lesa leiðbeiningarnar vel og vandlega.
Líklega eru einhverjir sem þurfa að vinna í verkefnum um helgina og því er mikilvægt að undirbúa það. Nemendur geta undirbúið sig með ýmsum hætti:
- Hægt er að hala niður upplýsingum af Námsvef
- Hægt er að setja verkefni á Google svæði
- Velja verkefni, ekki gera ráð fyrir að vinna í öllum verkefnum
- Ræða við kennarana um verkefnaskil
Að sjálfsögðu vonumst við til þess að yfirfærslan gangi sem best en ef einhverjir skyldu lenda í vandræðum verður hægt að fá aðstoð með að laga innskráningu og tengingu á Menntaský hér í FAS strax á mánudagsmorgun 6. desember. Ef fjarnemendur lenda í vandræðum geta þeir haft samband við kerfisstjóra (hjalp@martolvan.is) eða í síma 470 81 82.
Um miðjan nóvember fékkst það staðfest að FAS hefði náð að uppfylla skref 1 og 2 í verkefninu „græn skref ríkisstofnana„. Síðan þá hefur verið unnið að skrefum 3 og 4. Mánudaginn 29. nóvember náðist sá áfangi að FAS fékk úttekt á skrefum 3 og 4 og því er nú einungis eftir að uppfylla skref 5. Það var boðið upp á góðgjörðir af þessu tilefni á kennarastofunni og voru þeim gerð góð skil.
Í skrefum 3 og 4 er verið að ganga lengra í því að minnka losun gróðurhúsalofttegunda og minnka vistspor skólans. Það er t.d. verið að vinna í því að bæta aðstöðu þeirra sem koma hjólandi eða á rafmagnsbíl í Nýheima.
Nú stendur yfir vinna við skref 5 en þar er meira verið að horfa til framtíðar í umhverfismálum. Stefnt er að því að ljúka 5. skrefinu fyrir jól.
Í dag var komið að síðasta uppbroti annarinnar og núna höfðu nemendur veg og vanda að því að skipuleggja það. Það var ákveðið að spila Hornafjarðarmanna og skyldu verðlaun veitt fyrir efstu þrjú sætin. Að auki átti að verðlauna þann sem slökustum árangri náði í fyrstu umferð.
Það var byrjað að spila á níu borðum og eftir nokkrar umferðir hófust níu manna úrslit. Þeir sem báru sigur úr býtum á sínu borði komust í úrslitakeppnina. Þar áttust við Hermann Þór, Karen Ása og Tómas Nói og var spilað grand. Þegar spilinu lauk stóð Tómas Nói uppi sem sigurvegari, Karen Ása var í öðru sæti og Hermann Þór varð þriðji.
Sá sem beið lægstan hlut í fyrstu umferð var Sævar Rafn og fékk hann skammarverðlaunin. Öllum verðlaunum var vandlega pakkað inn í jólapappír og því ekki alveg ljóst hver þau voru. Það vakti þó athygli að skammarverðlaunin voru í stærsta pakkanum.
Flott framtak hjá ykkur krakkar og gaman að þið skylduð velja Hornafjarðarmanna því hann er jú nokkurs konar einkennisspil fyrir okkar svæði.
Miðvikudaginn 10. nóvember s.l. var lokaráðstefna DETOUR verkefnisins haldin í Nýheimum. Var ráðstefnan bæði í raunheimum og í gegnum Teams.
Áhugaverð erindi voru flutt á ráðstefnunni og var fyrirlesurum tíðrætt um umbreytandi ferðaupplifanir og leiðir innan ferðamennskunnar til að ferðast á umhverfisvænan máta. Umbreytandi upplifanir eru upplifanir sem gefa ferðalöngum færi á að fræðast og takast á við uppbyggilegar áskoranir og einn meginþátturinn í umhverfisvænum ferðamáta er að staldra lengur við á hverjum stað, gefa sér tíma til að kynnast áfangastaðnum og njóta þess sem hann hefur upp á að bjóða.
Fram kom að Ísland hefur allt til að bera til að vera áfangastaður hæglætis- og heilsueflandi ferðaþjónustu því ferðamenn sæki nú enn meira en áður í hreinleika, víðerni, hátt þjónustustig og stórkostlega náttúru, en þetta er meðal þess sem einkennir það sem ferðamenn sækjast eftir í auknu mæli.
Meðal þeirra sem ávörpuðu ráðstefnuna voru Katrín Jakobsdóttir forsætisráðherra, Dr Steve Taylor frá Skotlandi og Prófessor Edward H. Huijbens sem talaði frá Hollandi.
Að loknum erindum, huglægu ferðalagi og matarhléi ræddu þátttakendur ráðstefnunnar um afurðir DETOUR verkefnisins. Helstu niðurstöður samtalsins voru þær að verkefnið færði samfélögum og ferðaþjónustuaðilum gríðarlega mikið magn af fróðleik sem væri framsettur á aðgengilegan máta og gæti nýst öllum þeim ferðaþjónustufyrirtækjum sem vilja færa sig í átt að heilsueflandi vöruframboði og ná þannig til ört vaxandi markhóps ferðamanna.
Frekar fáir sáu sér fært að mæta til ráðstefnunnar en hún var tekin upp og hér má finna tengil inn á fyrirlestrahluta hennar: Lokaráðstefna DETOUR – upptaka
Hulda Laxdal tengiliður FAS í þessu verkefni þakkar þeim sem mættu á ráðstefnuna kærlega fyrir þeirra þátttöku og framlag í uppbyggilegu samtali og vonar að ferðaþjónustuaðilar verði duglegir að nýta sér DETOUR afurðirnar.
