Fyrir nokkru sögðum við frá því að nemendur á starfsbraut í FAS hefðu farið í heimsókn í rafmagnsdeild Skinneyjar-Þinganess. Síðustu vikur hafa tveir vinnustaðir bæst í hópinn.
Farið var í heimsókn til Gísla í Beinlínis en hann rekur byggingarfyrirtæki sem tekur að sér alls kyns smíðaverkefni. Fyrirtækið er með verkstæði á Víkurbrautinni og þangað var förinni heitið. Gísli tók á móti strákunum og fór yfir það helsta sem smiðir gera í sinni vinnu. Hann leyfði þeim síðan að spreyta sig á ýmsum verkefnum og prófa alls konar tól og tæki.
Í þessar viku var farið í heimsókn á lögreglustöðina. Þar tóku lögregluþjónarnir Grétar og Einar á móti strákunum. Þeir fóru yfir störf lögreglu á svæðinu og sýndu húsnæðið og alls konar búnað sem lögreglumenn nota í starfi sínu.
Strákarnir á starfsbrautinni eru mjög ánægðir með heimsóknirnar sem hefur verið farið í á önninni þar sem þeir hafa alls staðar fengið góðar móttökur og velvild. Við í FAS erum mjög þakklát fyrir að geta farið í heimsóknir sem þessar og um leið kynnt fjölbreytt störf í sveitarfélaginu. Meðfylgjandi eru nokkrar myndir frá síðustu tveimur heimsóknunum.
Það hefur verið nóg um að vera hjá nemendafélagi skólans undanfarið. Líkt og áður byggist félagslífið upp á klúbbastarfi þar sem nemendur skipuleggja viðburði og dagskrá. Það er góð mæting á fundi hjá nemendaráði, við náum góðum umræðum og skipuleggjum okkur vel. Í byrjun annar var t.d viðburður í íþróttahúsinu sem gekk vel.
Núna stendur yfir vinna við að skipuleggja viðburðadagatal fyrir önnina og það er ljóst að það verður nóg um að vera. Í kvöld ætlar bíóklúbburinn að bjóða upp á bíó í Þrykkjunni og NemFAS býður þar upp á snakk og nammi. Að sjálfsögðu hvetjum við alla til að mæta þar.
Í þessari viku fundaði nemendaráð með VA og ME en ME er að skipuleggja íþróttamót sem fer fram á Egilsstöðum og hugmyndin er að nemendur FAS taki þátt í því móti. Nánari upplýsingar koma seinna.
Þá er nemendaráð á fullu að skipuleggja árshátíð sem verður fimmtudaginn, 13. mars og síðar í sama mánuði ætlar nemendaráð að vera með viðburð þegar FAS fær heimsókn frá samstarfsskólunum í Finnlandi og Noregi.
Það er því nóg um að vera hjá nemendum FAS.
Eftir hádegi í dag voru viðvaranir vegna vonskuveðurs sem nú gengur yfir færðar upp á rautt stig fyrir stóran hluta landsins. Samkvæmt veðurspám verða rauðar og appelsínugular viðvaranir í gildi fyrir okkar svæði á morgun.
Því er búið er að ákveða að kennsla á morgun, fimmtudag verði fjarkennsla. Kennarar munu senda póst til sinna nemenda með fundarboði og nánari upplýsingum ef þurfa þykir.
Nýheimadagurinn var haldinn 30. janúar þar sem stofnanir Nýheima kynntu starfsemi sína.
FAS tók þátt í þessum degi og kynnti Hulda Laxdal Hauksdóttir skólann og þá sérstaklega eitt af þeim fjölmörgu verkefnum sem þar eru unnin.
Verkefnið sem var kynnt er Erasmus+ námsefnisgerðarverkefnið ForestWell sem er unnið í samstarfi við menntastofnanir og aðrar stofnanir í Danmörku, Finnlandi, Írlandi og Slóveníu. ForestWell verkefninu lýkur nú á vordögum og geta þá aðilar sem standa fyrir starfsmenntun á sviði ferðaþjónustu, heilsueflingar og samfélagslegrar uppbyggingar nýtt sér það frábæra námsefni sem finna má á heimasíðu verkefnisins Home – Forestwell
Meðfylgjandi eru nokkrar myndir frá kynningunni og öðru starfi sem farið hefur fram í tengslum við verkefnið.
Fyrr í þessari viku fóru nemendur á starfsbraut í FAS í heimsókn út í Ósland þar sem rafmagnsdeild Skinneyjar-Þinganess er til húsa. Þessi heimsókn er í áfanga sem heitir Starfakynning þar sem markmiðið er að nemendur kynnist hvað felst í störfum og hvaða nám er á bakvið starfið.
Það var Sigmar rafvirki sem tók á móti hópnum, hann fór yfir störf rafvirkja og hvar sé hægt að læra rafvirkjun. Strákarnir fengu síðan að prófa að tengja ljós. Þeir fengu efni og leiðsögn hver og einn og í lokin var síðan athugað hvort ljósið virkaði.
Nemendur okkar á starfsbraut voru mjög ánægðir með móttökurnar og ekki var verra að fá að spreyta sig. Kærar þakkir fyrir góðar móttökur.
Við höfum sagt frá því áður að á þessu skólaári tekur FAS þátt í samstarfsverkefninu HeimaHöfn með Þekkingarsetri Nýheima og Sveitarfélaginu Hornafirði. Þar er verið að vinna með ungu fólki, fulltrúum úr atvinnulífinu, skólum og öðrum hagsmunaaðilum á svæðinu. Meðal annars er verið að miðla upplýsingum um fjölbreytt tækifæri til menntunar og atvinnu á svæðinu. Og í dag var komið að því að fara í heimsókn í Skinney-Þinganes en það er stærsta fyrirtækið í sveitarfélaginu og þar vinna um 350 manns. Skinney-Þinganes er öflugt hátæknifyrirtæki sem vinnur á sjálfbæran hátt og fullvinnur allar afurðir.
Gestunum frá FAS var skipt í tvo hópa. Á meðan annar hópurinn fékk fræðslu um fyrirtækið gekk hinn hópurinn um vinnslusalina og skoðaði starfsemina. Það var sannarlega margt sem kom á óvart í þessari heimsókn. Þar má t.d. nefna öll þau fjölhæfu störf sem eru unnin í fyrirtækinu. Þar er að finna störf úr flestum greinum atvinnulífsins sem krefjast mismunandi undirbúnings og menntunar. Lögð var á það áhersla að fyrirtækið mun þurfa á fólki í fjölbreytt störf í framtíðinni sem krefjist alls konar sérhæfingar. Það var líka áhugavert að sjá alla sjálfvirknina í vinnslusölunum og hvernig vélar og róbótar vinna mörg störf sem mannshöndin sinnti áður.
Þá var nokkuð rætt um kosti þess að búa í samfélagi eins og okkar en líka rætt um mikilvægi þess að fólk kynnist öðrum svæðum og störfum. Það eykur víðsýni og reynslu sem er gott að búa að. En það er líka mikilvægt að unga fólkið okkar viti af öllum þeim tækifærum sem er að finna í heimabyggðinni. Það er þó allra best þegar fólk flytur aftur heim og finnur sér störf.
Við þökkum kærlega fyrir góðar móttökur og góða fræðslu.
