Framhaldsskólinn í Austur-Skaftafellssýslu og Haus hugarþjálfun hafa gert með sér samkomulag um að nemendur á afreksíþróttasviði FAS hafi aðgang að Haus hugarþjálfunarstöð. Þar læra nemendur að setja sér góð markmið, auka sjálfstraust og bæta einbeitingu en þetta eru allt þættir sem afreksíþróttafólk þarf að leggja áherslu á til að ná árangri í sinni íþrótt. Samstarfið tekur gildi frá og með næstu haustönn.
FAS fagnar þessu samstarfi og vonar að það muni styrkja og efla nemendur og hjálpa þeim að ná enn þá lengra í sinni íþrótt.
Þann 21. apríl lagði grunnnámshópur fjallanámsins af stað í leiðangur upp á Hrútsfjallstinda. Nemendur voru fimmtán talsins auk þriggja kennara og var veðurspá með besta móti og stóð til að gista upp frá í þrjár nætur. Það þýddi að bakpokar voru þungir en samt sem áður voru allir léttir í lund.
Fyrsti dagurinn var langur og náði hópurinn undir Vesturtind, skellti þar upp tjöldum og skriðu allir í svefnpoka til að hvíla lúin bein. Annan daginn gengum við upp á Vesturtind og æfðum sprungubjörgun fyrir hádegi, hádegismatur var svo snæddur í tjaldbúðum. Eftir hádegi skipti hópurinn sér upp í fjögur teymi sem klifu Hrútsfjallstindana þrjá sem eftir voru (á eftir Vesturtindi), Hátind, Miðtind og Suðurtind í veðurblíðunni.
Þriðja daginn pakkaði hópurinn saman tjöldum og hélt í átt að Hvannadalshnjúk. Þar skelltum við upp tjaldbúðum undir vesturhlíð hnjúksins áður en við gengum skotspöl að næstu sprungu til þess að æfa sprungubjörgun þar sem fleiri en eitt teymi aðstoðaði við björgunina. Veðrið var einstaklega gott þetta kvöld svo hópurinn útbjó hringlaga útieldhús þar sem mannskapurinn naut matar, söng og dansaði.
Síðasta daginn gekk hópurinn niður Virkisjökulsleiðina í mikilli sól og hita. Við vorum ánægð að komast til byggða eftir fjóra langa en góða daga á jöklinum. Heilt yfir var ferðin ógleymanleg og heilmikið ævintýri sem bæði reyndi á líkamlegt og andlegt þol. Hópurinn stóð sig með stakri prýði og styrktist enn meira og þéttist við þessa áskorun.
Kennarar í ferðinni voru Íris Ragnarsdóttir, Svanhvít Helga Jóhannsdóttir og Ólafur Þór Kristinsson.
Það er vel við hæfi á síðasta degi vetrar að taka til hendinni og hreinsa og tína drasl sem hefur fallið til í vetur. Eins og svo oft áður efndu íbúar Nýheima til hreinsunardags þar sem allir sem geta leggja hönd á plóg. Það er búið að tína rusl, sópa, hreinsa á milli gangstéttarhellna og reita illgresi. Ekki spillir fyrir að veðrið er ljómandi gott og hentar vel til útiveru.
Eftir gott hreinsunarstarf var öllum boðið upp á grillaða hamborga og þeim voru gerð góð skil.
Við erum ánægð með afrakstur vinnunnar getum við tekið vel á móti sumardeginum fyrsta sem er á morgun. Gleðilegt sumar öll og takk fyrir veturinn.
Það er okkur sannarlega mikið gleðiefni að flytja nýjustu tíðindi af stöðu náms í fjallamennsku í FAS. Næsta vetur mun námið verða í boði með svipuðu sniði og undanfarin ár. Það ár mun verða notað til að finna náminu farveg til framtíðar. Við höfum verið í erfiðum hjalla undanfarið sem nú hefur fengist tímabundin lending á.
Flest erum við vel meðvituð um mikilvægi námsins, ekki síst hér á suðausturhorninu þar sem stór hluti ferðaþjónustu tengist ferðum á jökli og á fjöllum. Það er mikilvægt að fagfólk sé leiðandi í ferðum þar sem mikilvægt er að öryggi sé tryggt og lesið í veður og aðstæður metnar. Það er ekki síður mikilvægt fyrir skólann og samfélagið að FAS muni áfram geta boðið upp á fjallamennskunámið.
Í meðfylgjandi grein eftir Erlu Guðnýju Helgadóttur má lesa um mikilvægi menntunar í fjallaleiðsögn á Íslandi.
Undanfarnar vikur og mánuði hafa margir lagst á árar með að standa vörð um námið og þökkum við öllum viðkomandi fyrir stuðninginn.
Við höfum áður sagt frá nemendaskiptaverkefni sem fjallar um náttúrulegar auðlindir og nýtingu þeirra en það verkefni hófst síðastliðið haust. Þetta er tveggja ára verkefni undir merkjum Nordplus og þátttökulöndin eru Finnland, Noregur og Ísland. Í verkefninu er gert ráð fyrir heimsókn til eins af þátttökulöndunum á hverri önn. Við hér í FAS fengum gesti til okkar í október og áttum góðar stundir saman.
Nú er komið að næstu heimsókn sem að þessu sinni verður til Noregs. Íslenski hópurinn leggur af stað til Keflavíkur á morgun, laugardag og flýgur utan á sunnudag og við verðum komin til Brønnøysund um kvöldmat. Það er þétt og mikil dagskrá í næstu viku þar sem bæði er verið að kynnast landi og þjóð og eins að vinna að verkefnavinnu. Hægt verður að fylgjast með ferðum hópsins á https://nr.fas.is/
Meðfylgjandi mynd var tekin þegar íslenski hópurinn kvaddi gestina í haust.
Vetrarferðamennskuáfanginn í fjallamennskunáminu hófst með vinnustofu í Reykjavík þar sem nemendur fóru yfir leiðaval, hvernig á að ferðast án ummerkja og notkun á viðleigubúnaði í vetraraðstæðum. Daginn eftir var förinni heitir norður í fjögurra nátta tjaldferðalag með ferðaskíði og púlkur: Stefnan var tekin í Fjörður austur af Grenivík. Tjöldum var slegið upp eftir nokkra klukkutíma á skíðunum fyrsta daginn. Næsta morgun skíðaði hópurinn alla leið í skálann á Gili sem er á miðjum Flateyjarskaganum norðanverðum. Áhersla var lögð á rötun, leiðarval ásamt hóp- og hraðastjórnun á þessum ferðadögum. Hópurinn tjaldaði við skálann og nýtti sér frábæra aðstöðu sem þar var til að hita vatn, borða og funda innandyra.
Daginn eftir var farið yfir tæknilegri atriði í vetrarferðamennsku s.s. hvernig á að ganga í línu þegar ferðast er um á snjóhuldum jöklum, mismunandi gerðir snjóakkera, ísaxarbremsu og göngutækni í snjó. Hóparnir völdu sér landslag í fjalllendi nærri skálanum til að æfa þessi atriði, en þennan dag eins og aðra var hópnum skipt upp í fjóra minni hópa sem ferðuðust hver í sínu lagi.
Eftir aðra nótt við skálann hélt hópurinn áleiðis heim á leið í átt að upphafsstað. Upphafleg áætlun gerði ráð fyrir að ferðast í hring og skíða inn Trölladal og koma niður á Grenivík rétt austan Kaldbaks en þar sem færið var mjög hart og ísað tók hópurinn ákvörðun um að fara frekar sömu leið til baka. Það er eitt af því sem áhersla er lögð á að kenna í Fjallamennskunámi FAS, að breyta skipulagi þegar aðstæður kalla á slíkt og taka til greina vægi nýrra upplýsinga sem gætu stangast á við fyrri plön. Hópurinn tjaldaði fjórðu nóttina um þremur kílómetrum frá bílunum og gerði góða tilraun til að grafa snjóhús inn í bakka sem skafið hafði í, en ekki var nægileg snjódýpt til að það gengi vel eftir. Á síðasta og fimmta degi ferðarinnar skíðaði hópurinn niður á veg með púlkurnar í eftirdragi, sem er ákveðin áskorun á gönguskíðum. Ferðin endaði svo í sundlauginni á Grenivík með dásamlegt útsýni yfir Kaldbak og fjalllendið sem hópurinn hafði ferðast um.
Við þökkum Ferðafélaginu Fjörðungi fyrir góðar móttökur og stuðning og einnig Sundlauginni á Grenivík sem opnaði snemma til að hleypa ferðalöngum í bað.
Kennarar í áfanganum voru Tómas Eldjárn Vilhjálmsson, Svanhvít Helga Jóhannsdóttir, Michael Robert Walker, Daníel William Saulite og Ólafur Þór Kristinsson.
