Það var þétt setinn bekkurinn í fyrirlestrasal Nýheima í morgun þegar skólinn var settur. Lind skólameistari ávarpaði hópinn, bauð alla velkomna og stiklaði á stóru í starfinu framundan. Að því loknu fluttu staðnemendur sig á Nýtorg en nemendur í fjallanámi héldu áfram í fyrirlestrasalnum. Á báðum stöðum var farið yfir það mikilvægasta í upphafi skólaárs. Klukkan 13 í dag verður tækniaðstoð fyrir nemendur í stofu 204 og hvetjum við alla til að mæta þangað sem ekki eru komnir inn í kerfi skólans.
Á morgun verður kennt eftir svokallaðri hraðtöflu og með því móti næst að fara stuttlega yfir alla áfanga sem eru í boði. Á mánudag hefst kennsla samkvæmt stundaskrá.
Það var gaman að sjá hversu margir mættu í morgun og bjóðum alla velkomna til starfa.
Skólastarf haustannar hefst fimmtudaginn 24. ágúst næstkomandi þegar skólinn verður settur í fyrirlestrasal Nýheima klukkan 10. Að lokinni skólasetningu hitta nemendur umsjónarkennara sína og það verður farið yfir það mikilvægasta í skólastarfinu fram undan.
Þann 25. ágúst verður kennt eftir svokallaðri „hraðtöflu“ en þá hitta kennarar í hverjum áfanga nemendahópa sína í 20 mínútur og þá verður farið yfir skipulag annarinnar. Kennslan eftir hraðtöflu hefst klukkan 8:30 á föstudag.
Ef það eru einhverjir sem eru að velta fyrir sér að fara í nám hvetjum við þá til að skoða námsframboð skólans og hægt er að sækja um nám hér. Best er að sækja um nám sem fyrst en skráningu á haustönnina lýkur 1. september.
Við hlökkum til að hittast á ný eftir sumarið og erum spennt fyrir nýrri önn.
Nú er störfum síðasta skólaárs að ljúka og starfsfólk farið í sumarfrí. Skrifstofa skólans opnar aftur miðvikudaginn 9. ágúst.
Ef einhverjir eru að velta fyrir sér að fara í nám í haust er hægt að skoða upplýsingar um námsframboð á vef skólans og þar er einnig hægt að sækja um nám. Það er hægt að hafa samband við Lind skólameistara í sumarfríinu ef erindið er brýnt (lind@fas.is og 615 32 09).
Við vonum að allir eigi gott og gefandi sumar.
Laugardaginn 27. maí fór fram útskrift fjallamennskunema frá FAS. Að þessu sinni útskrifuðst 12 nemendur.
Úr Fjallamennskunámi skólans útskrifast: Andrés Nói Arnarsson, Ástrós Jensdóttir, Brynjar Örn Arnarson, Edda Sól Ólafsdóttir Arnholtz, Jökull Davíðsson, Linda E Pehrsson, Malgorzata Nowak, Thelma Marín Jónssdóttir, Ólafur Tryggvi Guðmundsson, Páll Sigurgeir Guðmundsson, Snorri Ingvason og Styrmir Einarsson. Af þessum 12 útskriftarnemendum, halda 6 áfram í framhaldsnám.
Kennarar í Fjallamennskunámi FAS og starfsfólk skólans óska útskriftarnemendum öllum til hamingju með áfangann og hlakkar til að hittast á fjöllum!
Hæfniferð FAS er ígildi lokaprófs en þar fá nemendur tækifæri til að sýna fram á þá hæfni og þekkingu sem þeir hafa öðlast í gegnum skólagönguna. Lagt er upp með í áfanganum að nemendur takist á við fjölbreytt og flókið landslag, hvort sem það er utan hefðbundinna gönguleiða eða upp á hájökli. Leiðbeinendur í þessum áfanga eru í aftursætinu og til ráðgjafar en nemendur stýra ferðinni og skiptast á að leiðsegja hópnum.
Veðurspáin var ekki upp á sitt besta fyrir fyrri hæfniferð en í byrjun ferðar rigndi mikið. Á meðan beðið var eftir veðurglugga til að hefja upphaf ferðar var samið við kajakfyrirtækið Iceguide um að leigja báta og búnað og róa um Heinabergslón en þetta bauð nemendum upp á aðra sýn inn í þá fjölbreyttu möguleika sem ferðaþjónustan býr að á svæðinu.
Næst var förinni heitið milli Skaftafells og Núpsstaðaskógar, yfir Skeiðarárjökul. Það er tilkomumikil ganga sem oft er gengin á þremur eða fjórum dögum. Hópurinn fór hratt yfir og kláraði gönguna á tveimur og hálfum degi. Aðra nóttina gistu þau í Skaftafellsfjöllum í um 700 metra hæð og hina á heiðinni norðan Súlutinda þar sem komið er í land af jöklinum. Hópurinn tók eftir það einn hvíldardag og skipulagði ferð á Þverártindsegg daginn eftir sem lá um Kálfafellsdal. Á hvíldardeginum var æfður böruburður með léttri línuaðstoð en oft á tíðum eru það leiðsögumenn sem eru fyrstir á staðinn þegar slys verða í fjalllendi og því nauðsynlegt að kunna réttu handtökin.
Í seinni hæfniferð var spáin allslæm á sunnanverðu landinu. Því var brugðið á það ráð að skipuleggja göngu um Víknaslóðir þar sem besta veðrinu var spáð. Gengið var á þremur dögum frá Borgarfirði eystri og suður á Seyðisfjörð með gistingu í skálum Breiðuvíkur og Loðmundarfjarðar. Við viljum þakka fyrir frábærar móttökur hjá Ferðafélagi Fljótsdalshéraðs sem tók höfðinglega á móti nemendum og kennurum og við erum viss um að þarna kemur FAS aftur. Það var gaman að enda árið í veglegum skálum í óbyggðum enda frábær ferðamáti sem gerir fólki kleyft að ganga lengra með léttari poka, svo ekki sé minnst á samveruna sem er hvergi betri en utan símasambands í fögrum dal og góðum skála.
Í lok ferðar var ætlunin að ganga á Snæfell en vegna veðurs var ákveðið að ganga á hinn formfagra Búlandstind í Berufirði. Frábær tindur sem bauð upp á brölt og skemmtilegt leiðarval í brattlendi. Einnig fór hópurinn saman á Óbyggðasetrið á glæsilega sýningu um sögu óbyggða- og fjallaferða í gegnum aldirnar. Þetta var því ekki bara fjalla- og hæfniferð heldur einnig nokkurs konar menningarferð þar sem nemendur lærðu sitthvað nýtt um sögu fjallaferða hér á landi.
Ferðirnar tvær voru ólíkar að flestu leyti en gengu þó báðar stórvel, spiluðu með veðri og stóðu nemendur sig með stakri prýði.
Kennarar í áfanganum voru: Tómas Eldjárn Vilhjálmsson, Elín Lóa Baldursdóttir, Erla Guðný Helgadóttir og Árni Stefán Haldorsen.
Eins og svo oft áður á þessu fallega skeri var veðrið aðeins að stríða okkur. Því var ákveðið að byrja kennsluna innanhúss og til þess er enginn staður betri en Mikligarður – við kunnum Klifurhúsinu og Garðabæ bestu þakkir fyrir að fá að nýta þessa aðstöðu.
Leiðsluveggurinn í Miklagarði býður upp á frábært tækifæri til að vinna í tækni, æfa sig í að leiða og læra á GriGri (tryggingartól sem notað er í sportklettaklifri og er skylda að nota í flestum veggjum innanhúss). Það var gaman að sjá hvað nemendurnar okkar þrír voru áhugasamir og höfðu gaman af því að „toga í plastið.“
Við náðum svo einum útidegi í Stardal – sem er gýgtappi rétt utan við Reykjavík sem býður upp á það allra besta dótaklifur sem fyrirfinnst á íslandi. Þessa fyrstu tvo daga var Óli með okkur sem gestakennari og við því með þrjá kennara og þrjá nemendur. Það var upplagt að nýta það. Við byrjuðum því á að klifra hver og einn með sinn nemanda og skiptum leiðinni upp í stuttar spannir þannig að þeir fengu allir að kynnast því hvernig ferlið virkar, millitryggingar, megintryggingar og það að skipta á milli spanna. Eftir hádegið hafði veðrið batnað verulega og við lékum okkur aðeins í Leikhúsinu og svo tóku nemendurnir við að leiða mjög létta leið, setja inn sínar eigin tryggingar og byggja akkeri. Við kennararnir fylgdum svo með léttu spjalli um hvað var vel gert og hvað væri hægt að bæta.
Þriðja daginn var veðrið aftur orðið vafasamt og við tókum léttan dag í Miklagarði. Fjórði dagurinn fór svo alfarið í veður (sem var stjörnuvitlaust) og akstur á Höfn. Því miður höfðu orðið nokkur afföll af nemendum þegar til Hafnar var komið og aðeins þriðjungur skilaði sér alla leið – Guðný Gígja var ein eftir og fékk því að velja sér sjálf hvernig við nýttum fimmta daginn. Hún valdi ekki minna metnaðarfullt en 11 spanna leiðina Boreal sem var boltuð af þeim félögum Guðjóni Snæ og Snævari Guðmundssyni. Leiðin er litlir 480m af klifri + aðkoma um mjög grófa skriðu upp Vestrahornið og eitt sig af bakhliðinni – og svo sama skriðan niður. Þó klifrið sé kannski ekki erfitt í sjálfu sér skiptir öllu máli að allir kunni til verka, skiptingar milli spanna séu fumlausar og að klifrið flæði nokkuð vel. Því þó 480m séu ekki mikil vegalengd í okkar daglega lífi – þá er þetta töluverð vegalengd í klifri.
Í stuttu máli gekk þessi dagur eins og í sögu. Við vorum í skjóli frá hvössum austanvindi þangað til kom að því að síga niður bakhliðina og klifrið var því hið ánægjulegasta. Guðný hafi greinilega verið að fylgjast með dagana áður og var fumlaus í allri sinni vinnu og við Mika áttum algerlega frábæran dag í vinnunni.
Þar sem það var litlu við þetta að bæta, bara einn nemandi eftir sem var þegar búinn að klifra leið sem fæstir ná nokkurn tímann að klifra og rigning í spánni þá fékk Guðný frí síðasta daginn. Hægt er að skoða leiðina nánar á https://www.isalp.is/problem/boreal
Kennarar voru Mike Walker & Ívar F. Finnbogason. Nemendur í ferðinni voru: Arna, Guðný Gígja og Ásta.
