Níu annars árs nemendur fóru með þeim Dan Saulite og Ívari F. Finnboga í átta daga vetrarleiðangur á Vatnajökul 15. til 22. maí. Hópurinn fór upp Skáfallsjökul og náði í Grímsvötn á fjórða degi í frábæru veðri. Daginn eftir var brostið á með stormi sem stóð í tvo daga – það sem átti að vera einnar nætur stopp varð því þrjár nætur. En lítið hægt að kvarta yfir því í jarðhita-upp-hituðum skála með gufubaði og sturtu.
Eftir þetta langa stopp í Grímsvatna SPA var kominn tími til að haska sér heim á leið. Það var gert með því að fara niður á Breiðarmerkurjökul milli Mávabyggða og Esjufjalla og leggja að baki rúmlega 60km á tveimur dögum. Það er hörkuhópur sem klárar þannig verkefni!
Allt í allt frábær túr og ljúfsárt að kveðja nemendurna eftir tveggja ára samvistir á fjöllum.
FAS hefur lengi verið þátttakandi í fjölbreyttri Evrópusamvinnu bæði í formi nemendaskipta- og námsefnisgerðarverkefna. Öll hafa þessi verkefni verið unnin í anda Evrópusamstarfs þar sem áhersla er á að auka víðsýni og þekkingu þátttakenda á aðstæðum og menningu samstarfsaðilanna og heimalöndum þeirra.
Á þessu ári eru 30 ár síðan EES samningurinn var undirritaður en hann veitti Íslandi aðgang að innri markaði Evrópusambandsins og aukin tækifæri til samstarfs í Evrópu. Í tilefni af þeim tímamótum bauð Rannís, Utanríkisráðuneytið, Háskóla-, iðnaðar- og nýsköpunarráðuneytið og Sendinefnd ESB á Íslandi til afmælishátíðar miðvikudaginn 8. maí sl. Á þessari afmælishátíð sem Guðni Th. Jóhannesson forseti Íslands opnaði var góðum árangri Evrópusamvinnunnar fagnað með kynningu á nokkrum verkefnum sem metin voru sem fyrirmyndarverkefni. Námsefnisgerðarverkefnið ADVENT sem hannað var og stýrt af FAS var valið af Landsskrifstofu Erasmus+ sem fyrirmyndaverkefni og þáði FAS boðið. Hulda Laxdal Hauksdóttir verkefnastjóri ADVENT kynnti verkefnið og gaman er að geta þess að verkefni frá Nýheimum fékk einnig viðurkenningu og voru þær Hugrún Harpa Reynisdóttir og Kristín Vala Þrastardóttir á svæðinu að kynna sitt verkefni.
ADVENT sem er skammstöfun fyrir enska heiti verkefnisins, Adventure Tourism in Vocational Education and Training var þriggja ára verkefni sem stóð frá 2017 – 2020 þar sem unnið var með ferðaþjónustufyrirtækjum og stofnunum í ævintýraferðaþjónustu, skólum og rannsóknarstofnunum í Finnlandi, Skotlandi og á Íslandi. Gaman er að geta þess að við styrkveitingu úr sjóðum Erasmus+ fékk ADVENT lang hæsta styrk ársins 2017. Í ADVENT var unnið með nýstárlegri aðferð að námsefnisgerð þar sem starfandi aðilar í ævintýraferðaþjónustu mótuðu námsefni út frá greiningu sinni á þörf fyrir símenntun innan greinarinnar. Ferðaþjónustufyrirtæki hvers þátttökulands unnu, með aðstoð skólanna og rannsóknastofnananna að því að hanna og skipuleggja námskeið sem þeir byggðu á sinni eigin hæfni og sérhæfingu og ætlað var að mæta þörfum greinarinnar á hverjum stað. Alls voru unnin níu námskeið og voru þrjú þeirra prufukeyrð í hverju þátttökulandi verkefnisins. Námskeiðin voru þessi:
Finnland:
Fræðst um staðhætti
Vöruvæðing ævintýraupplifunar
Hvernig ævintýraferðamaður ert þú?
Ísland:
Ævintýri á jökli
Hið staðbundna; vöruvæðing og nýsköpun
Að segja sögur með snjallsímum
Skotland:
Sjálfsuppbygging í náttúrunni
Leiðsögn og túlkun
Túlkun strandsvæða
Hægt er að kynna sér ADVENT verkefnið á heimasíðu þess: https://adventureedu.eu/is
Síðustu ár hefur FAS litið svo á að tenging skólans út í samfélagið og atvinnulífið sé mikilvægur þáttur skólastarfsins og frá því að ADVENT verkefnið hófst hefur skólinn verið virkur þáttakandi í evrópskri námsefnisgerð sem styður við símenntun aðila á vinnumarkaði í álfunni. Það var því mikill heiður fyrir skólann að fá þessa gæðaviðurkenningu frá Rannís og Erasmus+. Þessi viðurkenning er ekki síst til komin vegna góðrar vinnu verkefnisstjórans á Íslandi. Til hamingu Hulda með flott verkefni.
Það má segja að allt hafi verið á hvolfi í FAS í morgun. Ástæðan er sú að væntanleg útskriftarefni ákváðu að breyta hefðbundinni uppröðun í rýmum skólans og laga þar aðeins til. Þar var hugmyndflugið látið ráða og ekki verið að velta mikið hönnun innandyra fyrir sér.
Eins og undanfarin ár var væntanlegum útskriftarefnum boðið í morgunmat með starfsfólki skólans og átti hópurinn notalega stund saman og naut kræsinga hjá Sigrúnu. Flestir útskriftarnemendur taka þátt í að dimmitera en það er þó ekki algilt og svo er einnig að þessu sinni.
Síðasti kennsludagur annarinnar er á morgun, þriðjudag og eftir það taka lokamatsviðtöl við. Við óskum útskriftarnemendum sem og öllum öðrum nemendum góðs gengis í vinnunni framundan.
Útskrift frá FAS fer fram laugardaginn 25. maí í Nýheimum. Athöfnin hefst að þessu sinni klukkan 12:30. Það verða útskrifaðir stúdentar og einnig nemendur úr fjallamennskunámi FAS.
Allir eru velkomnir á meðan að húsrúm leyfir og við vonumst til að sjá sem flesta.
Það er heldur betur farið að styttast í yfirstandandi skólaári og þá er ekki seinna að vænna en að fara að huga að næsta skólaári. Undanfarin ár hefur nemendaráð verið kynnt í lok skólaárs.
Að þessu sinni kom eitt framboð og það því sjálfkjörið. Það eru þær Helga Kristey, Isabella og Nína Ingibjörg sem að bjóða fram krafta sína í þágu skólans og þær kynntu sig og sín stefnumál í löngu pásunni í morgun. Þær kalla sig „sveitalúxusjullurnar“ og eru þar að vísa til upprunans. Helga Kristey ætlar að vera forseti nemendafélagsins, Nína Inigbjörg varaforseti og Isabella verður hagsmunafulltrúi SÍF fyrir skólans hönd. Þær lofa alls kyns sprelli og fjöri en til þess að svo megi verða þurfa nemendur að vera virkir og taka þátt í félagslífi skólans.
Við óskum þeim stöllum til hamingu og hlökkum til að fylgjast með félagslífinu á næsta skólaári.
Dagana 3. – 6. maí fór fram valáfangi í klettaklifri fyrir nemendur í grunnnámi fjallamennsku FAS. Að þessu sinni hittumst við á höfuðborgarsvæðinu og klifruðum á fjölbreyttum svæðum í kringum höfuðborgina en það er skemmtilegt fyrir nemendurna að kynnast fjölbreyttum klifursvæðum um allt land.
Áfanginn hófst í Miðgarði í Garðabæ en þar er frábær aðstaða til að stunda línuklifur innandyra. Þar var farið í leiðsluklifur, fallæfingar og ýmsa línuvinnu sem tengist klifri í fjölspannaleiðum. Á laugardeginum var haldið í Stardal í Mosfellsdal en svæðið má segja að sé paradís dótaklifrarans. Engir boltar eru á svæðinu og því þarf að tryggja allt með hefðbundnum tryggingum, hnetum og vinum. Þar fengu nemendur tækifæri til að leiða fjölspanna klifurleið, setja inn dótatryggingar, tryggja aðra klifrara upp til sín og reyna sig við hinar ýmsu leiðir. Á sunnudeginum héldum við út á Reykjanes í Háabjalla, þar er skjólsælt og gott að klifra og ekki skemmdi fyrir að nemendurnir mættu með grill og pyslur í hádegismat og grilluðu fyrir okkur öll. Svæðið hentar mjög vel fyrir byrjendur og er vel boltað sem gerir það að verkum að leiðsluklifrið er á færi allra. Við enduðum áfangann inni í Klifurhúsinu í Ármúla en þar fórum við yfir klifurtækni og æfingar sem gott er að vinna áfram með. Þökkum kærlega fyrir góðar móttökur þar.
Hópurinn stóð sig með prýði og mörg þeirra halda í lok mánaðarins til Lofoten í Noregi í klifurferð með FAS og eru því mjög spennt fyrir að æfa vel fyrir ferðina.
Takk fyrir okkur, Dan, Íris og Ívar.
