Þriggja landa menntaverkefnið ADVENT (Adventure Tourism in Vocational Education and Training) heldur áfram af fullum krafti og gaman er að geta nú greint frá fyrsta íslenska námskeiðinu sem er þriðja í röðinni af þeim níu námskeiðum sem prufukeyrð verða í verkefninu. Nú þegar hefur verið greint frá fyrstu tveimur námskeiðunum á vef FAS. Íslenska námskeiðið var prufukeyrt dagana 21. – 25. janúar sl. og snérist um jöklaferðamennsku. Námskeiðið fékk enska heitið Ice adventure – Planning and Skills sem útleggst sem Ævintýri á ís, skipulag og færni á íslensku.
Hugmyndafræði ADVENT verkefnisins snýst að miklu leyti um að þátttakendur á námskeiðum leggi þekkingu sína og reynslu saman og í gegnum upplifun, æfingar og samræður þátttakendanna verði til námssamfélag sem nýtist öllum jafnt til að auka þekkingu sína og færni. Þátttakendahópurinn samanstendur sem sagt ekki af nemendum og kennurum heldur eru það svokallaðir leiðandi þátttakendur sem stýra námskeiðinu en allir leggja í púkkið. Þeir leiðandi þátttakendur sem héldu utan um þetta námskeið voru Einar Rúnar Sigurðsson frá ferðaþjónustufyrirtækinu Öræfaferðum og Sigurður Ragnarsson og Eyjólfur Guðmundsson frá FAS. Þessir aðilar ásamt fleira góðu jökla- og fjalla fólki unnu að grunngerð námskeiðsins, en Einar, Siggi og Eyjólfur leiddu framkvæmdina sjálfa.
Þátttakendur námskeiðsins voru auk leiðandi þátttakendanna þriggja, ferðaþjónustuaðilar og nemendur frá þátttökulöndunum þremur, þrír frá Skotlandi, tveir frá Finnlandi og einn frá Íslandi.
Námskeiðið stóð í fimm daga þar sem fyrsti og síðasti dagur námskeiðsins fóru í ferðalög á milli Reykjavíkur og Hornafjarðar. Voru þessir dagar vel nýttir m.a. með stoppum við Sólheimajökul og fleiri áhugaverða staði. Lagt var upp úr því að skapa tækifæri fyrir samtöl allra þátttakenda og var þar víða komið við og t.d. rætt um rannsóknir á jöklum og eðli þeirra, skipulag jöklaferðamennsku og sögu hennar, öryggismál, sjálfbærni og margt fleira.
Hópurinn hélt til á Litla-Hofi í góðu yfirlæti og þaðan var haldið á jökul. Farið var á Skaftafells- og Breiðamerkurjökul og þeir báðir nýttir til að kynnast mismunandi skriðjöklum með jöklagöngum, íshellaskoðun, næturgistingu og ísklifri. Einnig var komið við í FAS þar sem málin voru rædd. Þátttakendur voru hæstánægðir með þessa prufukeyrslu og erum við sem að þessu verkefni stöndum þakklát gestunum fyrir framlag þeirra til námskeiðsins.
Fjórða námskeiðið í ADVENT verkefninu verður haldið í Skotlandi í mars þar sem námskeið um leiðsögn og túlkun á vettvangi og hvernig veita má gæðaþjónustu til ferðamanna verður prufukeyrt. Námskeiðið heitir á ensku Guiding and Interpretation – Quality Service. Þátttaka í námskeiðum ADVENT eru frábær leið til að byggja undir menntun innan afþreyingarferðaþjónustu á svæðinu og kjörið tækifæri fyrir þátttakendur að bæta við sig reynslu og þekkingu.
Nánar má lesa um ADVENT verkefnið á www.adventureedu.eu. ADVENT er með instagramsíðu https://www.instagram.com/adventureedu2020/ og verkefnið hefur líka fésbókarsíðu https://www.facebook.com/AdventErasmus/
