Áfanginn Afreksíþróttir hefur í nokkur ár verið hluti af námsframboði skólans. Margir nemenda okkar stunda reglulega íþróttir og eru jafnvel að æfa með liðum innan Sindra. Oft fer saman íþróttaiðkunin og áhugamál viðkomandi og með því að skrá sig í áfangann geta nemendur fengið einingar sem nýtast í náminu í FAS.
Í síðustu viku undirrituðu nokkrir nemendur í áfanganum samning við FAS. Það er kveðið á um að hver nemandi skuldbindi sig til að; framfylgja skólareglum, sinna námi sínu af kostgæfni, mæta á æfingar og vera fyrirmynd annarra hvað varðar heilsusamlegt líferni. Síðast en ekki síst þurfa þeir að skrá reglulega upplýsingar um æfingar, innihald þeirra og tímasetningar.
Þjálfari Sindra fylgist með þjálfun hvers nemanda og staðfestir að skráningar séu réttar. Íþróttakennari í FAS heldur utan um námið og ber ábyrgð á samstarfinu.
Samningurinn er mikilvægur áfangi fyrir bæði nemendur og skólann. Hann ætti að hjálpa nemendum að skipuleggja sig bæði hvað varðar nám í skólanum og eins viðkomandi íþróttagrein. Eins og flestir vita er regluleg ástundun og gott skipulag lykillinn að ná árangri.
Mennta- og menningarmálaráðuneytið hefur ákveðið að veita FAS styrk til að skrifa heildstæða námskrá í ferðatengdum greinum með námslokum á þriðja hæfniþrepi. Forsaga málsins er sú að námsframboð í ferðatengdum greinum hefur þótt fremur ómarkvisst og afrakstur námsins ekki nægjanlega skýr. Atvinnulífið hefur ekki heldur metið nám í ferðatengdum greinum með fullnægjandi hætti hingað til. Ráðuneytið leitaði til framhaldsskóla um námskrárskrifin og það varð úr að FAS tæki verkefnið að sér.
Í bréfi frá ráðuneytinu kemur einnig fram að nú sé mikið atvinnuleysi í ferðaþjónustu vegna COVID-19 en vonir eru þó bundnar við að ferðaþjónusta verði aftur mikilvæg atvinnugrein á Íslandi. Ráðuneytið telur brýnt að nýta tímann nú til að skrifa heildstæða námsbrautarlýsingu fyrir atvinnugreinina. Möguleiki sé að framhaldsfræðslan geti meðal annars í samstarfi við fyrirtæki boðið upp á sveigjanlegt nám og styttri námslotur sem framhaldsskólar geti metið inn á brautina.
Ætlast er til að námskráin verði skrifuð á þessu ári og lögð er áhersla á að lýsingin sé unnin í samstarfi við aðra framhaldsskóla, framhaldsfræðsluna og Hæfnisetur ferðaþjónustunnar.
Undanfarin þrjú ár hefur FAS leitt Erasmus+ menntaverkefnið ADVENT þar sem leitast var við að efla menntun, þróa og prófa nýjungar í ferðaþjónustu. Þetta verkefni var m.a. í samstarfi og samvinnu við ferðaþjónustuaðila á svæðinu. Verkefnið tókst vel og margar nýjungar í afþreyingu litu dagsins ljós, ekki hvað síst í tengslum við jöklaferðir.
Nú hefur Atvinnu- og nýsköpunarráðuneytið gert samning við FAS og veitt skólanum styrk til að efla menntun og rannsóknir á sviði jöklaferðamennsku. Markmið verkefnisins er að styðja við fyrirtæki sem starfa innan Vatnajökulsþjóðgarðs við að þróast og byggja sig upp með því að tengja menntun og rannsóknir við þarfir þeirra sem starfa í greininni.
Verkefninu verður í fyrstu stýrt af FAS og Háskólasetrinu á Höfn en gert er ráð fyrir að aðrir tengdir jöklaferðamennsku eigi fulltrúa í stýrihópi. Verkefnisstjóri mun vinna náið með stýrihóp að útfærslu og framkvæmd verkefnisins og gagnvirkri samvinnu við alla þátttakendur í verkefninu. Gert er ráð fyrir að verkefninu verði lokið í apríl 2021.
Seinni partinn í janúar verður öllum fyrirtækjum sem eru með starfsleyfi til jöklaferðamennsku í þjóðgarðinum boðin þátttaka í verkefninu. Hvert fyrirtæki getur nýtt sér verkefnið á þann hátt sem því gagnast best en ætlunin er að búa til gagnvirkt, skapandi fagsamfélag þar sem fólk miðlar af þekkingu sinni og reynslu og styrkir um leið nýsköpun hópsins í heild.
Nú hvetjum við alla sem að vinna við ferðir tengdar jöklum til að bregðast við boði um að taka þátt í spennandi verkefni og bæði miðla af reynslu sinni og læra af öðrum.
Undanfarið hafa bæði ríkistjórn landsins og sveitarfélagið unnið að því að kynna Heimsmarkmið Sameinuðu þjóðanna með það að markmiði að bæta lífskjör og hag allra. Það hafa verið haldnir margir fundir þar sem íbúar eru fengnir tll að koma að því að móta stefnu sveitarfélagsins til framtíðar.
Í dag var komið að því að hlusta á raddir unga fólksins og heyra hvað þau hafa til málsins að leggja. Matthildur bæjarstjóri boðaði til fundar með nemendum bæði í FAS og Heppuskóla. Eftir stutta kynningu á viðfangsefni fundarins fengu nemendur tækifæri til að koma sínum áherslum á framfæri með því að svara tilteknum spurningum. Nokkrir tugir nemenda tóku þátt og það er óhætt að segja að alls konar hugmyndir komu fram.
Sveitarfélagið mun svo á næstunni vinna úr hugmyndum sem komu fram og nýta til innleiðingar Heimsmarkmiðanna. Í febrúar á svo að skrifa undir samning þar sem sveitarfélagið skuldbindur sig til að innleiða markmiðin.
Á vorönn 2021 býður FAS upp á sviðslistaáfanga í leiklist og kvikmyndagerð. Tvær stuttmyndir verða unnar í áfanganum og munu allir nemendur koma að hvorri mynd sem tæknihópur og leikarar. Þessi áfangi er tilvalinn fyrir fólk sem sækist eftir grunnþekkingu í vinnu við gerð kvikmynda eða hefur áhuga á frekara kvikmyndanámi. Einnig þjálfun í framkomu og raddbeitingu. Áfanginn verður kenndur á miðvikudögum frá 8:00 til 12:30 og er gert ráð fyrir náinni samvinnu hópsins og lögð áhersla á 100% mætingu í tíma.
Þessi áfangi er líka í boði fyrir fólk utan skólans og er upplagður fyrir þá sem eru atvinnuleitendur en þeir mega taka allt að 12 einingum án þess að atvinnuleysisbætur skerðist. Námið hefst miðvikudaginn 20 janúar næstkomandi. Kennarar verða þeir Stefán Sturla og Skrýmir Árnason sem veitir nánari upplýsingar en hann hefur netfangið skrymir@fas.is
Umsóknarform er hægt að nálgast hér
Í dag byrjaði hæfnimat fyrir fólk með reynslu úr fjallamennsku. Á síðustu önn var ákveðið að bjóða upp á þennan valmöguleika í tengslum við verkefnið Nám er tækifæri sem Vinnumálastofnun stendur fyrir.
FAS ákvað að bjóða þeim sem hafa einhverja reynslu úr fjallamennsku að ganga í gegnum hæfnimat á því námi sem átti sér stað á haustönninni í fjallamennsku. Standist nemendur hæfnimat munu þeir stunda nám í fjallamennsku á vorönninni og hafa möguleika á því að ljúka brautinni í vor. Þetta mæltist vel fyrir og allir þeir sem sóttu um fyrir tilskilinn tíma og uppfylltu skilyrðin fyrir inntöku í námið fengu námsvist. Núna eru hingað mættir 15 nemendur víðs vegar af landinu og munu þeir eyða helginni hér, bæði innandyra og eins úti í náttúrunni.
Það má með sanni segja að það séu spennandi tímar í fjallamennskunáminu. Þegar þessir nemendur hafa lokið hæfnimati verða 40 nemendur skráðir á brautina í tveimur aðskildum hópum.
Þá má líka segja frá því að farið er að huga að framhaldsnámi í fjallamennsku sem vonandi verður í boði í haust.
