Í dag fór fram útskrift í fjallamennskunáminu í FAS. Af fyrsta ári útskrifuðust 24 nemendur og tveir af öðru ári. Þetta er í fyrsta skipti sem nemendur útskriftast af öðru ári.
Við óskum útskriftarnemendum innilega til hamingju með áfangann og óskum þeim jafnframt velfarnaðar í framtíðinni.
Þá er síðasta áfanga fjallamennskunámsins lokið en seinni hópurinn í hæfniferð hefur nýlokið ævintýralegri ferð. Að þessu sinni stóð leiðangur upp á Öræfajökul uppi sem sigurvegari kosninganna en nemendur og kennarar velja í sameiningu verkefni við hæfi í hæfniferð.
Á fyrsta degi lagði hópurinn lokahönd á skipulag og búnað í FAS og lagði af stað í Öræfin þar sem Óli hjá Local Guide skutlaði okkur upp að jökli um Sléttubjörg ofan við Hnappavelli. Gangan hófst því í um 800 metra hæð en það var kærkomið þar sem við bárum þungar birgðir fyrir þriggja nátta dvöl á jöklinum. Við gengum upp jökulinn, upp að Hnappi og settum upp tjaldbúðir í 1800 metra hæð á öskju Öræfajökuls í skafrenningi, kulda og roki. Í sameiningu byggðum við stóran skjólvegg og öll hjálpuðumst við að við að tjalda og byggja skjól.
Á öðrum degi var gengið yfir öskjuna í átt að Dyrhamri (1917 m) og Hvannadalshnjúk (2110 m). Við toppuðum öll Dyrhamar eftir þrjár spannir og fengum að launum stórkostlegt útsýni yfir Svínafellsjökul, Tindaborg og öræfska fjalladýrð. Þá héldu sum í átt að Hvannadalshnjúk og toppuðu hann einnig en önnur fóru á Rótarfjallshnjúk (1848 m) á leið heim í náttstað. Á þriðja degi gengum við í austurátt að Sveinstindi (2044 m) og Sveinsgnípu (1925 m) og toppuðum báða tindana, Sveinstindur er annar hæsti tindur landsins. Dagurinn gekk vel og þegar við komum aftur í tjaldbúðir tókum við smá kaffitíma en héldum síðan aftur út og klifruðum upp á Hnapp (1849 m) og þau sem ekki fóru á Rótarfjallshnjúk daginn áður héldu þangað líka.
Á fjórða degi var komið að því að ljúka dvöl okkar á Öræfajökli en við héldum niður af stærsta eldfjalli landsins um Kvískerjaleið og enduðum við hið fagra Múlagljúfur. Þar mættum við undrandi ferðamönnum sem spurðu hvort þau þyrftu allan þennan búnað sem við bárum á bakinu til þess að skoða gljúfrið.
Af þessari frægðarsögu sjáið þið að það vantar ekki kraftinn í útskriftarnemendur Fjallamennskunámsins. Við viljum þakka þeim öllum fyrir frábæran vetur og vonumst til að hitta útskriftarhópinn á fjöllum í sumar!
Takk fyrir okkur, Árni Stefán, Erla Guðný og Íris R.
Dagana 22. – 25. maí var annar af tveimur valáföngum í klifri haldinn og tóku níu nemendur þátt í námskeiðinu. Veðrið réði för og námskeiðið byjraði á svæðinu Háabjalla – sem hentar einstaklega vel fyrir byrjendur. Ekki spillti veðrið fyrir en það var sól og blíða. Næsta dag var farið í Stardal og dótaklifur tekið fyrir. Nokkrir nemendur leiddu sína fyrstu dótaleið þennan dag.
Ekki er hægt að ætlast til að fá gott veður á Íslandi þrjá daga í röð þannig að farið var inn hjá Klifurfélaginu Björk á þriðja degi og aðeins unnið í línuvinnu þar auk þess sem aðstaðan þar var nýtt til klifurs.
Síðasta daginn vorum við svo í mekka klettaklifursins á Íslandi, Hnappavöllum og eyddum blautum morgni í að byggja dótaakkeri og fara í aðra fjölspanna línuvinnu eins og hægt var. Seinnipartinn var svo bara klifrað eins og hver hafði smekk til.
Kennarar á námskeiðinu voru Dan Saulite, Mike Walker og Ívar F. Finnboga.
Nú eru flestir grunnskólar landsins að ljúka sínu skólastarfi og þá fara margir útskriftarnemendur að huga að næstu skrefum. Opið er fyrir umsóknir 10. bekkinga í FAS í gegnum Menntagátt og er opið fyrir umsóknir til 10. júní.
Frá 30. maí til 10. júní er umsækjendum boðið í viðtal með foreldrum sínum þar sem farið er yfir skipulag náms og námsval í FAS. Fundarboð verða send í tölvupósti. Nánari upplýsingar um skólann og umsóknarferlið veitir Fríður námsráðgjafi – fridur@fas.is
Nýverið fengu þeir Ástvaldur Helgi Gylfason og Tómas Eldjárn Vilhjálmsson kennarar í Fjallamennskunámi FAS tveggja milljóna króna styrk úr Þróunarsjóði námsgagna. Styrkinn ætlar þeir að nota til að skrifa og þróa kennsluefni í rötun sem mun meðal annars nýtast beint nemendum í fjallamennskunáminu.
Hugmyndin er að útbúa handbók sem nemendur muni geta stuðst við í gegnum allt námið sitt og mun taka fyrir rötun með korti, áttavita, gps og öðrum snjalltækjum. Ætlunin er bæði að uppfæra gamalt námsefni sem og að búa til nýtt sem hentar þeim staðli sem unnið er eftir í dag í leiðsögninni. Námsefnið verður gefið út rafrænt en einnig verða gerð kennslumyndbönd. Þeir Ástvaldur og Tómas stefna á að ljúka námsefnisgerðinni fyrir haustið 2023.
Þetta eru frábærar fréttir því það er mikilvægt að til sé gott námsefni í fjallamennskunáminu. Það verður spennandi að fylgjast með framhaldinu.
Síðasti áfangi annars árs nema við fjallamennskubraut FAS lauk með átta daga leiðangri á Vatnajökli þar sem nemendur drógu sleða á eftir sér með öllum þeim búnaði og vistum sem þurfti til að geta athafnað sig á jöklinum við fjölbreyttar aðstæður.
Nemendur nýttu sér þá þekkingu og reynslu sem þeir höfðu öðlast á síðastliðnum árum í náminu til að rata á öruggan hátt um jökulinn en gist var sex nætur í tjaldi og eina nótt í fjallaskála Jörfa á Grímsfjalli. Miklar breytingar voru í veðri á þeim tíma sem leiðangurinn stóð yfir og þurfti að stytta hann um tvo daga vegna þess en bróðurpart tímans var varið í hvítblindu. Ferðast var frá Skálafellsjökli og yfir í Grímsvötn en þaðan var ferðinni heitið í Hermannaskarð og að lokum niður Breiðamerkurjökul.
Það er skemmst frá því að segja að ferðin gekk mjög vel og hópurinn var einstaklega flottur. Allir unnu saman eins og smurð vél við oft á tíðum krefjandi aðstæður.
Kennarar voru Ívar Freyr Finnbogason og Tómas Eldjárn Vilhjálmsson.