Frá heimsókn til Grikklands í apríl 2019.
Í FAS er alltaf líf og fjör og nóg um að vera. Erasmus verkefnið Cultural heritage in the context of students’ carres er verkefni skólans í samvinnu við framhaldsskóla í Eistlandi, Lettlandi, Ítalíu og Grikklandi. Í verkefninu eiga nemendur að kynna land sitt og menningu og gjarnan á óhefðbundinn hátt; nemendur kynna menningu fyrir nemendum.
Þátttakendur FAS hafa nú þegar heimsótt Eistland og Grikkland. Eftir áramótin fara síðan íslenskir þátttakendur til Lettlands og Ítalíu.
En nú er komið að heimsókn þátttökuþjóðanna til Íslands. Dagana 30. september til 5. október munu 24 þátttakendur, nemendur og kennarar heimsækja Höfn. Og okkar nemendur hafa staðið í ströngu í haust við að undirbúa koma vina sinna.
Þema heimsóknarinnar er Sögur og Sagnir svo gera má ráð fyrir að talað verði um álfa, tröll og Grýlu kellinguna ásamt sonum hennar. Farið verður út á Horn þar sem ströndin, brimið og víkingaþorpið verður skoðað. Þá er ætlunin að ganga bakvið Mígandafoss í Bergárdal og labba um Höfn þar sem saga staðarins er sögð og einnig ætlum við að heimsækja Skinney-Þinganes.
Það er von okkar að gott verði í sjóinn svo hægt verði að bjóða í siglingu út fyrir ós. Unga fólkið gistir í heimahúsum svo gera má ráð fyrir að stundum verði setið við spjall og skemmtilegheit fram eftir nóttu.
Flokkunartunnur í FAS.
FAS tekur nú þátt í verkefninu Skólar á grænni grein og þema skólaársins er neysla. Í síðustu viku var stofnuð Umhverfisnefnd FAS en í henni eru fulltrúar nemenda, kennara og annarra starfsmanna. Í nefndinni eru níu manns og hún heldur utan um og skipuleggur starfið.
Í þessari viku fer fram neyslukönnun meðal allra í FAS og gengu fulltrúar nemenda í stofur í morgun og dreifðu eyðublöðum þar sem á að skrá ferðir vikunnar og matarneyslu. Í lok vikunnar verður blöðunum safnað saman og unnið úr gögnunum.
Auk þess að skoða ferðir og matarneyslu er úrgangur flokkaður á sérstakan hátt í þessari viku. Í lok vikunnar verður flokkað, talið og vigtað allt sem viðkemur matarneyslu í FAS. Markmiðið með þessu hvoru tveggja er að fá mat á stöðunni og sem síðan verður nýtt til að bæta um betur.
Við ætlumst til að allir leggi sig fram og vandi til verka í þessari viku.
Dagana 10. – 13. september komu nemendur í fjallamennskunámi FAS saman og núna var á dagskránni klettaklifurnámskeið. Námskeiðið var haldið á Höfn og á klifursvæðinu Hnappavöllum í Öræfum þar sem var farið í þriggja daga tjaldferð. Námskeiðið var það fyrra af tveimur þar sem áherslan er á að koma nemendum af stað í klettaklifri og öllu sem því tengist. Til dæmis að kynnast búnaði, hnútum, klettaklifurtækni og tjaldlífinu á Hnappavöllum. Námskeiðið er að mestu verklegt og lögð er áhersla að skoða nærumhverfið með tilliti til klettaklifurs. Á Höfn er stutt í sum bestu klifursvæði landsins og er bærinn því tilvalinn fyrir klifrara að alast upp og búa.
Á fyrsta degi komu nemendur fimm talsins og kennari saman í húsnæði skólans. Við byrjuðum daginn á að horfa á myndbönd til að tengjast menningunni í kringum klettaklifur og að fara yfir nauðsynlegan búnað og grunnatriði. Ekki var þó setið lengi á skólabekknum því strax fyrir hádegi vorum við svo heppin að fá að nota lítinn klifurvegg í íþróttahúsinu á Höfn. Allir fengu úthlutað búnaði sem samanstendur af klettaklifurskóm, klifurbelti og nokkrum karabínum og sérhæfðum fjallaklifurbúnaði. Veggurinn var prófaður og nemendur spreyttu sig í að klifra og tryggja hvern annan.
Þá var komið að stóru útilegunni. Mikilvægt er þegar stunda á klettaklifur að veður sé þurrt, og eftir vafasamar spár fram að námskeiði þá virtust veðurguðirnir ætla að vera okkur hliðhollir. Á miðvikudagsmorgun voru allir mættir á bílaplan skólans með útilegu- og klifurbúnað og lagt var á stað á Hnappavelli. Ferðin gekk vel og eftir uppsetningu á tjöldum var farið að klifra. Farið var í Hádegishamar og hafist handa. Þann dag náðum við að klifra fjórar klifurleiðir og læra fullt af tækni. Leiðirnar sem klifraðar voru; Nýfundnaland 5.5, Hey Kanína 5.8, Töfraflautan 5.6 og Freðamýra Jói 5.8.
Kvöldið fór í almenna spilamennsku eftir að hafa borðað æðislegan kvöldverð grillaðan á staðnum, en einn nemandinn gerðist svo góður að koma með grillið sitt. Enn bættist í hópinn og við fengum annan klifrara frá Höfn til að slást í hópinn, en hann hafði klárað þetta námskeið árinu áður en vildi klifra meira ?
Næsta dag vöknuðum við snemma því veðurspáin var mjög góð fyrripartinn en tvísýnni seinnipartinn. Labbað var í Þorgeirsrétt eystri og nemendum skipt í þrjá hópa. Hver hópur fékk úthlutaðri einni leið og svo var skipt á milli og mismunandi tækni æfð. Nemendur stóðu sig mjög vel og gátu lært af styrkleikum hvers annars. Á þessum degi æfðu nemendur sig mikið en hlupu þó í skjól á meðan rigningarskúr gekk yfir. Eftir dembuna var klifrað fram á kvöld og mikill þróttur var í hópnum.
Daginn eftir sem jafnframt var síðasti dagurinn var klifrað í Miðskjóli í frábæru veðri og dagurinn svo endaður í Káraskjóli sem er húsnæði björgunarfélagsins í Öræfum þar sem búið er að koma upp góðri klifuraðstöðu. Í ferðinni voru samtals voru klifraðar 10 leiðir, sigið niður tvo veggi og ein stór sigæfing.
Námskeiðið gekk mjög vel og veðrið var gott, hópurinn var mjög áhugasamur og hlökkum við til að fara í klifurferð tvö eftir tæpa viku. Kennari á námskeiðinu var Magnús Arturo Batista.
[modula id=“9787″]
Íris Mist og Axel Elí mætt á SÍF þing. Vigdís María var einnig með og tók þessa mynd.
Um nýliðna helgi hélt SÍF (Samband íslenskra framhaldsskólanema) aðalþing sitt og fóru þrír fulltrúar frá FAS þangað. Þingið stóð yfir í þrjá daga og var haldið í Háskólanum í Reykjavík. Þangað mættu um 50 nemendur víðs vegar af landinu. Í byrjun þings var fyrirlestur um hvað einkennir góða leiðtoga og hvernig þeir geti hrifið aðra með sér. Einnig var fjallað um réttindi nemendafélaga og nemenda í íslensku samfélagi. Mikið var um hópavinnu þar sem nemendur ræddu sín á milli um fyrirkomulag í þeirra skólum. Þá komu fulltrúar frá ráðuneytum menntamála og dómsmála og voru með innlegg. Lilja Alfreðsdóttir menntamálaráðherra skrifaði undir styrktarsamning við SÍF. Það er mikið gleðiefni því SÍF hefur verið án samnings síðustu þrjú árin.
Fulltrúar FAS eru afar ánægðir með ferðina. Þeir kynntust mörgum nemendum frá öðrum skólum og huga jafnvel á nánari samvinnu með skólum á Suðurlandi. Þá er stefnt að því að fara á sambandsstjórnarfund SÍF sem verður í nóvember.
Nemendafélag FAS er með instagramreikning og voru krakkarnir duglegir að setja inn myndir frá ferðinni. Endilega fylgist með þeim þar.
Uppbrot um vísindadaga og Grænfánaverkefnið.
Eftir hádegi í dag var komið að öðru uppbroti annarinnar í FAS. Tilgangurinn var tvenns konar. Annars vegar að ræða við nemendur um vísindadaga sem verða 30. – 31. október. Nú er ætlunin að bregða undir sig betri fætinum og fara í ferðalag í Skaftártungu og vinna að ýmsum verkefnum þar. Gert er ráð fyrir að fara á miðvikudegi og gista eina nótt. Með því að vinna vel í tvo daga er hægt að vinna sér inn frí á föstudeginum og þá hægt að hafa langa helgi. Ef það eru einhverjir sem telja að þeir komist ekki í ferðina á vísindadögum er þeir beðnir um að senda póst á Eyjólf (eyjo@fas.is) fyrir lok næstu viku.
Þá var þátttaka skólans í Grænfánaverkefninu Skólar á grænni grein kynnt þar sem við veltum fyrir okkur hvað við getum gert til að verða meðvitaðri um umhverfið okkar og hvað við getum gert til að minnka vistspor okkar. Til að stýra þeirri vinnu verður stofnuð Umhverfisnefnd FAS þar sem bæði nemendur og starfsmenn eiga fulltrúa. Fyrsti fundur umhverfisnefndarinnar er fyrirhugaður í næstu viku. Fyrsta verkefnið á önninni er að hver skoði ferðavenjur og neyslumynstur sitt. Það verður nánar kynnt eftir fund nefndarinnar. Við hvetjum alla til að vera virkir og taka þátt því að gera okkar besta til að minnka vistsporið og þar með að bæta jörðina okkar.
Félagslífið í FAS fer ágætlega af stað á haustdögum. Líkt og undanfarin ár fer mikið fyrir klúbbastarfi. Núna eru sex klúbbar starfandi. Það eru formenn klúbba og forsetar skólans sem mynda nemendaráð skólans.
Í gær var komið að fyrsta opinberlega viðburðinum. Hann kallaðist Kráargátur sem flestir þekkja sem Pubquiz. Viðburðurinn fór fram í Ungmennahúsi en FAS hefur aðgang að því á þriðjudögum og fimmtudögum. Krakkarnir stefna að því að nýta þessa frábæru aðstöðu eins og kostur er í vetur.
Það var ágætlega mætt í gær og keppnin var jöfn og spennandi. Það fór þó svo að lokum að liðið hans Kristofers vann og þurfti innbyrðis viðureign til að sjá hver fengi verðlaunin. Og það var Kristofer sjálfur sem stóð uppi sem sigurvegari.
[modula id=“9785″]
