Starfsbraut

Brautarlýsing:

Starfsbraut er ætluð nemendum sem hafa notið verulegrar sérkennslu, verið í sérdeild eða verið kennt samkvæmt einstaklingsnámskrá (stjörnumerkt einkunn) í grunnskóla, ýmist vegna fötlunar eða annarra ástæðna. Markmið starfsbrautar er að veita nemendum einstaklingsmiðaða almenna menntun þar sem áhersla er á að auka sjálfstraust, sjálfstæði og félagslega virkni nemenda. Náminu er ætlað að veita nemendum góða, almenna undirstöðuþekkingu með áherslu á undirbúning fyrir lífið, atvinnuþátttöku og/eða frekara nám.

Námið er einstaklingsmiðað og aðlagað að hverjum og einum og er skipulagt með tilliti til þess nemendahóps sem innritast á brautina hverju sinni.  Þannig geta áherslur og þátttaka í áföngum verið mismunandi á tímabilinu. Nám á starfsbraut getur verið allt að fjögur ár og er einingafjöldinn sem nemendur útskrifast með einstaklingsbundinn. Nemendur á starfsbraut hafa tækifæri á að taka áfanga af öðrum námsþrepum og námsbrautum ef þeir hafa áhuga og/eða hæfni til þess. Námslok eru á 1. þrepi.

Inntökuskilyrði:

Nám á starfsbraut er ætlað nemendum sem notið hafa verulegrar sérkennslu, verið í sérdeild eða verið kennt samkvæmt einstaklingsnámskrá (stjörnumerkt einkunn) í grunnskóla, ýmist vegna fötlunar eða annarra ástæðna.

Innritunarferlið:

Nemendur sem eru að ljúka grunnskóla og hyggjast sækja um nám á starfsbraut gera það inni á innritun.is í febrúar ár hvert. Æskilegt er að greinagóðar upplýsingar um námsstöðu og/eða þjónustuþörf umsækjenda fylgi með. Eftir að umsókn berst og hefur verið samþykkt verða foreldrar og nemendur boðaðir í innritunarviðtal.