Gróðurreitir FAS á Skeiðarársandi skoðaðir

Í gær fóru staðnemendur í inngangsáfanga að náttúruvísindum á Skeiðarársand í gær til að vitja gróðurreita sem FAS hefur fylgst með frá árinu 2009. Það er mikilvægt að fara alltaf á svipuðum árstíma til að afla gagna svo upplýsingar verði sem sambærilegastar á milli ára.

Fyrir ferðina er nemendum skipt í hópa og allir eru með hlutverk. Það er margt sem þarf að skoða í ferðinni og mikilvægt er að skrá allar upplýsingar skýrt og skilmerkilega.  Nemendur þurfa að skoða hvaða gróður er að finna í reitunum, áætla gróðurþekju innan reitanna og samsetningu hennar, telja allar trjáplöntur og ef trjáplanta hefur náð 10 cm hæð þarf að mæla hæð hennar, finna lengsta árssprota, athuga hvort hún myndar rekkla og eins að athuga ummerki um beit eða ágang skordýra.

Veður í gær var ákjósanlegt til útiveru og athuganir og mælingar gengu ljómandi vel. Með í för voru þær Hólmfríður frá Náttúrustofu Suðausturlands sem stjórnaði öðrum hópnum á vettvangi og Heiða Vilborg okkur til halds og trausts.