Í fyrrahaust var farið af stað með nám í íslensku og stærðfræði fyrir þá sem að höfðu verið frá námi í einhvern tíma. Upphafið að þessu námi má rekja til raunfærnimats í vélvirkjun á vegum Þekkingarnetsins; þar sem þeir sem höfðu mikla starfsþekkingu fengu hana metna. Til að öðlast réttindi þurfti að taka nokkrar almennar bóklegar greinar. Margir aðrir nýttu sér þetta tækifæri til að fara aftur í skóla. Í fyrravetur stunduðu 15 - 20 manns þetta nám.
Núna er boðið upp á ensku og dönsku. Alls eru 25 nemendur skráðir í ensku og 17 á dönsku. Fyrirkomulagið er með sama sniði og í fyrra, þ.e. nemendur eru í skólanum frá 16 - 19 mánudaga til fimmtudaga og gert er ráð fyrir að hægt sé að ljúka öllu námi á þeim tíma. Það er gleðilegt að sjá hversu margir hafa skráð sig og vonum við að þeim farnist námið vel. 

Í gær komu til Hornafjarðar tæplega þrír tugir nemenda og kennara frá Max-Planck Gymnasium í Tríer í Þýskalandi. Hér voru á ferð nemendur sem okkar nemendur heimsóttu í vor þegar þeir fóru til Þýskalands. Eftir að hafa fengið kvöldmat í Nýheimum fóru nemendur i gistingu á nokkrum stöðum á Höfn auk þess sem ríflega tugur gisti á fjósloftinu á Seljavöllum.
Eftir morgunmat í morgun voru Nýheimar skoðaðir og einnig var farið á Jöklasafnið sem hópnum fannst mjög áhugavert. Héðan heldur hópurinn svo austur á bóginn og mun dvelja næstu daga Egilsstöðum hjá félugum sínum í ME og VA.
Þó hér hafi verið staldrað stutt við voru gestirnir alsælir og þakklátir þeim öllum sem skutu skjólshúsi yfir þá síðast liðna nótt.